សេចក្តីថ្លែងការណ៍មួយរបស់កងទ័ពថ្លែងនៅថ្ងៃចន្ទថា ការវាយប្រហាររបស់សមាជិកសកម្មប្រយុទ្ធតាលីបង់ទៅលើស្រុក Aliabad នៅភាគខាងជើងខេត្ត Kunduz ត្រូវបានសមត្ថកិច្ចបង្ក្រាប ហើយសមាជិកក្រុមសកម្មប្រយុទ្ធបានដកថយវិញក្រោយពីពួកគេរងនូវគ្រោះថ្នាក់ និងមានសមាជិកស្លាប់។
ប្រភពដដែលញ្ជាក់ឲ្យដឹងថា សមាជិកក្រុមសកម្មប្រយុទ្ធបានធ្វើការវាយលុកយ៉ាងខ្លាំងទៅលើប៉ុស្តិ៍ត្រួតពិនិត្យសន្តិសុខនៅក្នុងស្រុក Aliabad នៅម៉ោង ៨ព្រឹក ថ្ងៃចន្ទ ប៉ុន្តែកងកម្លាំងសន្តិសុខដែលទទួលបានការគាំទ្រដោយយន្តហោះប្រយុទ្ធបានធ្វើការប្រយុទ្ធតបតវិញ និងបង្ខំឱ្យសមាជិកក្រុមសកម្មប្រយុទ្ធដកថយក្រោយពីមានសមាជិកសកម្មប្រយុទ្ធចំនួន៨នាក់ស្លាប់ និងចំនួន១២នាក់ទៀតរងរបួស។
ប្រភពក៏បានបន្ថែមឲ្យដឹងផងដែរថា កងកម្លាំងរដ្ឋាភិបាលបានបោសសម្អាតសមាជិកក្រុមបះបោរពីភូមិទាំងអស់នៅក្នុងស្រុក និងបានរកឃើញរួចដោះគ្រាប់មីនប្រឆាំងរថក្រោះ និងគ្រាប់មីនប្រឆាំងមនុស្សចំនួន២៧គ្រាប់ក្នុងកំឡុងពេលធ្វើប្រតិបត្តិការ។
សមាជិកក្រុមតាលីបង់ដែលបានបង្កើនសកម្មភាពខណៈពេលមានកិច្ចចរចាសន្តិភាពជាមួយប្រទេសអាហ្វហ្គានីស្ថាននៅក្នុងទីក្រុង Doha ពុំទាន់ធ្វើសេចក្តីអត្ថាធិប្បាយណាមួយនៅឡើយទេ។
ប្រែសម្រួល៖ប៉ោក លក្ខិណា
ប្រភព Xinhua ចុះផ្សាយថ្ងៃទី២៨ ខែកញ្ញា ឆ្នាំ២០២០
