នៅថ្ងៃចន្ទ ទី២៨ ម្សិលមិញនេះ ប៉ូលិសតួកគីបានជួយសង្គ្រោះកុមារស៊ីរីចំនួន៦៨នាក់ដែលរងការជួញដូរពីប្រទេសស៊ីរី និងបង្ខំឱ្យដើរសុំទាននៅតាមដងផ្លូវក្នុងទីក្រុងអ៊ីស្តង់ប៊ុល(Istanbul ) នៅប្រទេសតួកគី។
យោងតាមប្រភពភ្នាក់ងារព័ត៌មាន Demiroren បានឲ្យដឹងថា អង្គភាពប៉ូលិសបានបើកប្រតិបត្តិការក្នុងពេលដំណាលគ្នាលើអាសយដ្ឋានចំនួន០៩នៅទូទាំងទីក្រុងដើម្បីជួយសង្គ្រោះកុមារពីដៃរបស់អង្គការឧក្រិដ្ឋកម្មស៊ីរី។
ប្រភព Demiroren បញ្ជាក់ថា សមត្ថកិច្ចចាប់ឃុំខ្លួនសមាជិកជាប់សង្ស័យរបស់អង្គការនេះសរុបចំនួន២៤ នាក់ ហើយកុមារចំនួន ៦៨នាក់ទទួលបានការជួយសង្គ្រោះអំឡុងប្រតិបត្តិការវាយឆ្មក់នោះ។ សមត្ថកិច្ចក៏បានរឹបអូសសាច់ប្រាក់ចំនួនច្រើនជាង ៣២,០០០ ដុល្លារអាមេរិកនៅក្នុងអាសយដ្ឋាននោះផងដែរ។
សូមរំលឹកផងដែរថា ប្រទេសតួកគីកំពុងទទួលជនភៀសខ្លួនស៊ីរីចំនួនច្រើនជាង៣,៧ លាននាក់ទៅរស់នៅលើទឹកដីរបស់ខ្លួន ដោយជនភៀសខ្លួនគេភាគច្រើនរស់នៅក្នុងទីក្រុងធំ។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៨ ខែកញ្ញា ឆ្នាំ២០២០
