ក្រសួងការពារជាតិអ៊ីរ៉ាក់បាននិយាយថាជនស៊ីវិល៥នាក់ក្នុងនោះមានស្ត្រី២នាក់ និងកុមារ៣ នាក់ត្រូវបានសម្លាប់នៅក្នុងការវាយប្រហារដោយគ្រាប់រ៉ុក្កែតក្បែរអាកាសយានដ្ឋានបាដាដ កាលពីថ្ងៃច័ន្ទនេះ។
បញ្ជាការប្រតិបត្តិការចម្រុះរបស់ក្រសួងបាននិយាយនៅក្នុងសេចក្តីថ្លែងការណ៍មួយថារ៉ុក្កែត Katyusha ចំនួន២គ្រឿងបានធ្លាក់ចុះនៅលើផ្ទះមួយកន្លែងស្ថិតនៅតំបន់ Radwaniyah។
ក្រសួងបាននិយាយថាក្មេង២នាក់ផ្សេងទៀតបានរងរបួសនៅក្នុងការវាយប្រហារនេះ។ គ្រាប់រ៉ុក្កែតត្រូវបានបាញ់ចេញពីសង្កាត់ Jihad ក្នុងរដ្ឋធានីបាដាដ។
គួរបញ្ជាក់ថាក្រុមសកម្មប្រយុទ្ធបាននិងកំពុងវាយលុកមូលដ្ឋានយោធាអ៊ីរ៉ាក់ជាញឹកញយដែលមានទីបញ្ជាការកងទ័ពអាមេរិក ស្ថានទូតអាមេរិក និងស្ថានទូតបរទេសមួយចំនួនទៀតស្ថិតនៅតំបន់បៃតងដែលមានកំពែងដ៏រឹងមាំក្នុងរដ្ឋធានីបាដាដនេះ។
អ្នកប្រែសម្រួល៖ គល់ សេងហាក់
