យោធាអ៊ីរ៉ាក់បាននិយាយនៅក្នុងសេចក្តីថ្លែងការណ៍មួយកាលពីថ្ងៃច័ន្ទនេះថាគ្រាប់រ៉ុក្កែត Katyusha ២គ្រាប់បានធ្លាក់កាលពីល្ងាចថ្ងៃអាទិត្យនេះស្ថិតនៅក្នុងតំបន់ Jadiriya នៃរដ្ឋធានីបាដាជិតតំបន់បៃតងដ៏រឹងមាំដោយមិនបណ្តាលឲ្យមានមនុស្សរងគ្រោះថ្នាក់។
យោធាបាននិយាយនៅក្នុងសេចក្តីថ្លែងការណ៍ថាគ្រាប់រ៉ុក្កែតមួយគ្រាប់បានធ្លាក់នៅជិតសណ្ឋាគារ Babylon។
យោធាអ៊ីរ៉ាក់បានស្តីបន្ទោសក្រុមភេរវករចំពោះការវាយប្រហារនេះ និងបាននិយាយថារ៉ុក្កែតត្រូវបានបាញ់ចេញពីតំបន់មួយស្ថិតនៅភាគខាងលិចនៃរដ្ឋធានី។
គួរបញ្ជាក់ថារ៉ុក្កែតផ្លោងចេញជាទៀងទាត់ដោយឆ្លងកាត់ទន្លេ Tigris ឆ្ពោះទៅកាន់តំបន់បៃតងដែលមានការការពារយ៉ាងខ្លាំងដែលមានអគាររដ្ឋាភិបាល និងបេសកកម្មបរទេសរួមទាំងស្ថានទូតអាមេរិក។
នាយករដ្ឋមន្ត្រីអ៊ីរ៉ាក់លោក Mustafa Al-Kadhimi បានសន្យានៅក្នុងកិច្ចប្រជុំជាមួយអ្នកការទូតជាន់ខ្ពស់ដើម្បីការពារបេសកកម្មបរទេស និងកំណត់ការកាន់កាប់អាវុធដល់កងកម្លាំងរបស់រដ្ឋបន្ទាប់ពីមានការគំរាមកំហែងរបស់សហរដ្ឋអាមេរិកក្នុងការបិទស្ថានទូតរបស់ខ្លួននៅក្នុងរដ្ឋធានី។
អ្នកប្រែសម្រួល៖ គល់ សេងហាក់
ប្រភពព័ត៌មានពី baghdadpost ចេញផ្សាយថ្ងៃទី ០៦ ខែតុលា ឆ្នាំ២០២០
