ប៉ូលិសនិយាយថា នៅថ្ងៃអង្គារ ទី០៦ ខែតុលានេះ មានអ្នកដំណើរចំនួន០៤នាក់រងរបួសនៅពេលដែលខ្មាន់កាំភ្លើងវាយឆ្មក់លើរថយន្តក្រុងដឹកអ្នកដំណើរមួយនៅក្នុងស្រុក Mandera នៃប្រទេសកេនយ៉ានៅតាមបណ្តោយព្រំដែនសូម៉ាលី។
លោក Rono Bunei មេបញ្ជាការប្រចាំតំបន់ភាគឥសានបានបញ្ជាក់ពីឧប្បត្តិហេតុនេះដោយនិយាយថា ជនសង្ស័យ al-Shabab បានបាញ់លើរថយន្តក្រុងដោយប្រើគ្រាប់កាំភ្លើងនៅក្នុងតំបន់ Kutulo ភាគឥសាននៃប្រទេសកេនយ៉ា។
តំបន់ Kutulu ទីតាំងដែលមានការវាយប្រហារកើតឡើងនោះ គេឃើញមានការវាយប្រហារជាច្រើនចេញពីក្រុមជនសង្ស័យជាសកម្មប្រយុទ្ធអាល់សាបាប។
សូមរំលឹកផងដែរថា តំបន់ភាគឥសានរបស់ប្រទេសកេនយ៉ាធ្លាប់រងការវាយប្រហារពីគ្រាប់បែកដៃ និងកាំភ្លើងជាច្រើននៅឆ្នាំចុងក្រោយនេះ ចាប់តាំងពីប្រទេសកេនយ៉ាបានយកកងទ័ពរបស់ខ្លួនទៅកាន់ប្រទេសសូម៉ាលីនៅឆ្នាំ២០១១ ដើម្បីប្រយុទ្ធប្រឆាំងនឹងក្រុមជីវពលអាល់សាបាប។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៦ ខែតុលា ឆ្នាំ២០២០
