យោធាអ៊ីរ៉ាក់និយាយថា នៅថ្ងៃពុធ ទី០៧ ម្សិលមិញនេះ សមាជិកក្រុមសកម្មប្រយុទ្ធរដ្ឋអ៊ីស្លាមសរុបចំនួន០៦នាក់ត្រូវគេសម្លាប់នៅក្នុងប្រតិបត្តិការមួយនៅខេត្ត Anbar ភាគខាងលិចប្រទេសអ៊ីរ៉ាក់។
អ្នកនាំពាក្យអគ្គមេបញ្ជាការនៃកងកម្លាំងអ៊ីរ៉ាក់លោក Yehia Rasool និយាយនៅក្នុងសេចក្តីថ្លែងការណ៍មួយថា ដោយមានការគាំទ្រពីកាំភ្លើងធំរបស់ប្រទេសអ៊ីរ៉ាក់ កងកម្លាំងសន្តិសុខបានធ្វើប្រតិបត្តិការមួយដោយផ្អែកលើរបាយការណ៍ចារកម្មនៅវាលខ្សាច់ Anbar។
ជាលទ្ធផល ប្រតិបត្តិការនោះបានសម្លាប់សមាជិកសកម្មប្រយុទ្ធ IS ចំនួន ០៦នាក់ និងចាប់បានមនុស្សម្នាក់ទៀត ហើយថែមទាំងបានបំផ្លាញកន្លែងលាក់ខ្លួនចំនួន០២ទីតាំង និងរថយន្តមួយគ្រឿង។
សមាជិកក្រុមសកម្មប្រយុទ្ធ IS នៅតែមានសកម្មភាពយ៉ាងសកម្មនៅក្នុងវាលខ្សាច់ Anbar ដ៏ធំល្វឹងល្វើយ ដែលលាតសន្ធឹងព្រំដែនជាមួយប្រទេសជិតខាងដូចជាស៊ីរីហ្សកដានី និងអារ៉ាប់ប៊ីសាអូឌីតព្រោះថា សមាជិកឧទ្ទាម IS បានជ្រៀតចូលទៅក្នុងប្រទេសអ៊ីរ៉ាក់ជាញឹកញាប់ក្នុងគោលបំណងប្រមូលផ្តុំកម្លាំងមកវិញ។
សូមរំលឹកផងដែរថា ស្ថានភាពសន្តិសុខនៅក្នុងប្រទេសអ៊ីរ៉ាក់មានលក្ខណៈប្រសើរឡើងយ៉ាងខ្លាំង ក្រោយពីកងកម្លាំងសន្តិសុខអ៊ីរ៉ាក់បានប្រកាសរំដោះប្រទេសអ៊ីរ៉ាក់ពេញលេញចេញពីការគ្រប់គ្រងរបស់ក្រុមសកម្មប្រយុទ្ធ IS នៅចុងឆ្នាំ២០១៧ ហើយកងកម្លាំងអ៊ីរ៉ាក់បានធ្វើប្រតិបត្តិការម្តងហើយម្តងទៀតដើម្បីត្រួតត្រាតំបន់ព្រំដែនទាំងមូលជាមួយប្រទេសស៊ីរី និងវាលខ្សាច់ក្បែរនោះនៅភាគខាងលិចប្រទេសអ៊ីរ៉ាក់៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៧ ខែតុលា ឆ្នាំ២០២០
