នៅព្រឹកថ្ងៃចន្ទ ទី១២ ការវាយប្រហារមួយបានកើតឡើងនៅក្នុងតំបន់ Benishangul-Gumuz ភាគខាងលិចនៃប្រទេសអេត្យូពី បណ្តាលឲ្យមនុស្សចំនួន១២នាក់ស្លាប់។
នៅក្នុងសេចក្តីប្រកាសព័ត៌មានលោក Gashu Dugaz ប្រធានការិយាល័យសន្តិសុខ និងសន្តិសុខរដ្ឋបាលប្រចាំតំបន់ Benishangul-Gumuz បញ្ជាក់ថា ការវាយប្រហារប្រដាប់ដោយអាវុធនៅក្នុងតំបន់ Mandura និងតំបន់ Metekel កើតឡើងនៅព្រឹកថ្ងៃចន្ទបណ្តាលឱ្យមនុស្សចំនួន១២នាក់ស្លាប់។
លោក Dugaz មានប្រសាសន៍ថា មនុស្សម្នាក់ផ្សេងទៀតដែលរងរបួសនៅក្នុងការវាយប្រហារកំពុងទទួលការព្យាបាលនៅតាមមណ្ឌលសុខាភិបាលក្បែរនោះ។ លោក Dugaz បន្ថែមថា ជនល្មើសជាប់សង្ស័យបច្ចុប្បន្នស្ថិតនៅក្រោមការឃុំឃាំងរបស់កងកម្លាំងសន្តិសុខសហព័ន្ធ និងតំបន់ដែលមានពង្រាយកម្លាំងការពារអំពើហឹង្សា។
នៅថ្ងៃព្រហស្បតិ៍ សប្តាហ៍មុន ការវាយប្រហារប្រដាប់ដោយអាវុធនៅតំបន់ Mandura និងតំបន់ Metekel នៃរដ្ឋ Benishangul-Gumuz បានបណ្តាលឱ្យមនុស្សចំនួន១៤នាក់ និងជនបរទេសម្នាក់ផ្សេងទៀតស្លាប់។
សូមរំលឹកផងដែរថា នៅក្នុងខែកញ្ញា ការវាយប្រហារប្រដាប់ដោយអាវុធនៅក្នុងតំបន់តែមួយបានបណ្តាលឲ្យជនស៊ីវិលចំនួន២០នាក់ស្លាប់។ មន្ត្រីអេត្យូពីបានថ្លែងថា ការវាយប្រហារប្រដាប់អាវុធបានកើតឡើងម្តងហើយម្តងទៀតដោយកំណត់គោលដៅលើជនជាតិភាគតិច គឺជនជាតិអាម៉ារ៉ាស (Amharas)។
អំពើហឹង្សារវាងសមាជិកក្រុមជនជាតិភាគតិចផ្សេងៗគ្នានៅក្នុងរដ្ឋ Benishangul-Gumuz នៅរយៈពេលប៉ុន្មានខែថ្មីៗនេះបណ្តាលឱ្យមនុស្សចំនួនរាប់រយនាក់ស្លាប់ និងមនុស្សចំនួនរាប់ពាន់នាក់ទៀតត្រូវផ្លាស់ទីលំនៅ។ការប៉ះទង្គិចគ្នាភាគច្រើនកើតឡើងដោយសារការចង់បានអំណាច និងធនធានដីធ្លី។
ប្រែសម្រួល៖ប៉ោក លក្ខិណា
ប្រភព័ត៌មាន Xinhua ចុះផ្សាយថ្ងៃទី១២ ខែ១០ ឆ្នាំ២០២០