ភ្នាក់ងារសារព័ត៌មាន TASS រាយការណ៍ថា នៅថ្ងៃចន្ទ ម្សិលមិញនេះ មនុស្សចំនួន០៣នាក់ស្លាប់ និងចំនួន០៣នាក់ផ្សេងទៀតរងរបួស ក្រោយពីមានហេតុការណ៍បាញ់ប្រហារនៅចំណតឡានក្រុងមួយនៅតំបន់ Nizhny Novgorod ភាគកណ្តាលនៃប្រទេសរុស្ស៊ី។
ភ្នាក់ងារព័ត៌មាន TASS ដកស្រង់ប្រភពព័ត៌មានពីលោកប្រធានក្រសួងកិច្ចការផ្ទៃក្នុងតំបន់ថា “ ពលរដ្ឋម្នាក់នេះត្រូវបានគេបាញ់សម្លាប់ក្នុងហេតុការណ៍វឹកវរ” ។
គេមិនទាន់ស្គាល់អត្តសញ្ញាណរបស់ខ្មាន់កាំភ្លើងឬឃាត់ខ្មាន់កាំភ្លើងខ្លួនបាននៅឡើយទេ។ ភ្នាក់ងារសារព័ត៌មាន TASS រាយការណ៍ថា មន្ត្រីប៉ូលិសកំពុងអនុវត្តវិធានការណ៍ជាច្រើនដើម្បីស្វែងរកអ្នកទទួលខុសត្រូវ។ ប្រភពសារព័ត៌មាន TASS និយាយថា មនុស្សចំនួន០៤នាក់ស្លាប់ និងជាច្រើននាក់ផ្សេងទៀតរងរបួសនៅក្នុងហេតុការណ៍នោះ។
ភ្នាក់ងារសារព័ត៌មាន RIA Novosti ដកស្រង់ប្រសាសន៍របស់អភិបាលតំបន់លោក Gleb Nikitin ដែលមានសេចក្តីថា “បើចាំបាច់ជនរងគ្រោះនឹងត្រូវគេជម្លៀសទៅមណ្ឌលសុខភាពក្នុងតំបន់” ។
យោងតាមប្រភពដដែលបញ្ជាក់ឲ្យដឹងថា ស្ថានភាពនៅតែមានភាពតានតឹងខណៈប៉ូលិសបានធ្វើការព្រមានដល់ប្រជាជនក្នុងតំបន់អោយមានការប្រុងប្រយ័ត្នខណៈដែលជនល្មើសមានអាវុធនៅក្នុងដៃ៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៣ ខែតុលា ឆ្នាំ២០២០
