នៅថ្ងៃអាទិត្យ ទី១៨ ខែតុលា ម្សិលមិញមានហេតុការណ៍ផ្ទុះយ៉ាងកក្រើកមួយកើតឡើងនៅខាងក្រៅការិយាល័យប៉ូលិសខេត្តនៅតំបន់ Firoz Koah ក្នុងខេត្ត Ghor ដោយសម្លាប់មនុស្សចំនួន១៦នាក់ និងបណ្តាលឲ្យមនុស្សចំនួន៩០នាក់រងរបួស។
លោក Abdul Latif Rahimi ប្រធានមន្ទីរសុខាភិបាលខេត្តប្រាប់ភ្នាក់ងារសារព័ត៌មានថាចំនួនអ្នកស្លាប់ និងរបួសចុងក្រោយនឹងផ្តល់ជូនប្រព័ន្ធផ្សព្វផ្សាយនៅពេលក្រោយ។ លោក Many មានប្រសាសន៍ថា អ្នករងរបួសជាច្រើនស្ថិតក្នុងស្ថានភាពធ្ងន់ធ្ងរនៅឡើយ។
មន្ត្រីសន្តិសុខម្នាក់ដែលសុំមិនបញ្ចេញឈ្មោះបញ្ចាក់ឲ្យដឹងថា ហេតុការណ៍ផ្ទុះនេះកើតឡើងនៅម៉ោង ១១និង ១៥នាទីព្រឹក (ម៉ោងក្នុងតំបន់) នៅពេលដែលរថយន្តដឹកទំនិញតូចមួយគ្រឿងត្រូវគេបំផ្ទុះលើតាមដងផ្លូវនៅក្នុងតំបន់ដែលមានមន្ទីរនគរបាលខេត្តនិងការិយាល័យរដ្ឋាភិបាលជាច្រើន។
លោកបន្ថែមថា មូលហេតុនៃការផ្ទុះនេះអាចជាការបំផ្ទុះគ្រាប់បែកអត្តឃាត។ ចំណែកឯ ការផ្ទុះបណ្តាលឲ្យផ្សែងក្រាស់ៗហើរទៅលើមេឃ និងបង្កឱ្យមានការភ័យស្លន់ស្លោររួមជាមួយនឹងបង្កឲ្យមានការបំផ្លាញជាច្រើន។
កងកម្លាំងសន្តិសុខបានឡោមព័ទ្ធតំបន់នោះសម្រាប់វិធានការការពារជាមុន។ ពុំទាន់មានក្រុមណាមួយប្រកាសទទួលខុសត្រូវចំពោះការវាយប្រហារនេះនៅឡើយទេ។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៨ ខែតុលា ឆ្នាំ២០២០
