កងទ័ពចេញសេចក្តីថ្លែងការណ៍មួយនៅថ្ងៃច័ន្ទ ទី១៩ នេះថា ការវាយប្រហាររបស់សមាជិកតាលីបង់ដើម្បីគ្រប់គ្រងផ្លូវធំនៅក្នុងខេត្ត Baghlan ភាគខាងជើងប្រទេសអាហ្វហ្គានីស្ថានត្រូវកងកម្លាំងសន្តិសុខបង្ក្រាប ហើយសមាជិកក្រុមសកម្មប្រយុទ្ធនៅសេសសល់បានរត់គេចខ្លួន ក្រោយពីសមាជិករបស់ពួកគេចំនួន០៧នាក់ស្លាប់។
យោងតាមសេចក្តីថ្លែងការណ៍បានឱ្យដឹងថា សមាជិកក្រុមសកម្មប្រយុទ្ធប្រដាប់អាវុធបានបើកការវាយលុកយ៉ាងខ្លាំងលើផ្លូវធំក្នុងតំបន់ Kilagai នៅយប់ថ្ងៃអាទិត្យ ប៉ុន្តែចលនារបស់ពួកគេត្រូវសមត្ថកិច្ចបំផ្លាញ ក្រោយពីសមាជិករបស់ពួកគេចំនួន០៧នាក់ស្លាប់ និងចំនួន០៨នាក់ផ្សេងទៀតរងរបួស។ សេចក្តីថ្លែងការណ៍ពុំបានលើកឡើងអំពីគ្រោះថ្នាក់ដែលអាចកើតមានលើកងកម្លាំងសន្តិសុខ ហើយបន្ថែមថា កងកម្លាំងបានបន្តដេញតាមក្រុមសកម្មប្រយុទ្ធ។
ផ្លូវល្បឿនលឿនដែលតភ្ជាប់ពីរដ្ឋធានីកាប៊ុលទៅនឹងខេត្តភាគខាងជើងចំនួន៨ឆ្លងកាត់តំបន់ Kilagai ក្នុងខេត្ត Baghlan ហើយប្រសិនបើក្រុមសកម្មប្រយុទ្ធតាលីបង់អាចគ្រប់គ្រង តំបន់ Kilagai ពួកគេអាចបិទផ្លូវហាយវេបានយ៉ាងងាយដើម្បីរំខានចរាចរណ៍រវាងទីក្រុងកាប៊ុលនិងខេត្តនៅភាគខាងជើង។
ក្រុមសកម្មប្រយុទ្ធតាលីបង់មិនទាន់ធ្វើអត្ថាធិប្បាយនៅឡើយទេ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៩ ខែតុលា ឆ្នាំ២០២០
