សន្តិសុខក្នុងស្រុករាយការណ៍ថា នៅថ្ងៃចន្ទ ទី១៩ ខែតុលា កងកម្លាំងសន្តិសុខតួកគីបានឃាត់ខ្លួនជនសង្ស័យចំនួន០៤នាក់របស់គណបក្សពលករឃឺដ (PKK) ដែលមានផែនការវាយប្រហារ។
ភ្នាក់ងារសារព័ត៌មាន Demiroren និយាយថា ប៉ូលិសបានបើកប្រតិបត្តិការដំណាលគ្នាប្រឆាំងនឹងសមាជិក PKK នៅក្នុងទីក្រុងអ៊ីស្តង់ប៊ុលនិងនៅភាគអាគ្នេយ៍ខេត្ត Diyarbakir។
ប្រភពបន្ថែមថា ជនសង្ស័យទាំងនោះមានទាំង អ្នកបច្ចេកទេសផ្នែកថ្នាំសន្លប់របស់មន្ទីរពេទ្យរដ្ឋមួយរូប ដោយជនសង្ស័យរូបនោះកំពុងតែព្យាយាមធ្វើការវាយប្រហារ។
ភ្នាក់ងារសារព័ត៌មាន Anadolu ដែលគ្រប់គ្រងដោយរដ្ឋនិយាយថា ភ្នាក់ងារវាយប្រហារទទួលបានការបណ្តុះបណ្តាលដើម្បីអនុវត្តការវាយប្រហារនៅក្នុងទីក្រុង។
PKK ត្រូវប្រទេសតួកគី សហរដ្ឋអាមេរិក និងសហភាពអឺរ៉ុប ចុះបញ្ចី និងចាត់ទុកថាជាអង្គការភេរវករ ហើយពួកគេបានប្រយុទ្ធប្រឆាំងនឹងរដ្ឋាភិបាលតួកគីអស់រយៈពេលច្រើនជាង ៣០ឆ្នាំមកហើយដើម្បីទទួលបានស្វ័យភាព។
សូមបញ្ជាក់ផងដែរថា ជម្លោះនេះបានសម្លាប់មនុស្សច្រើនជាងចំនួន០៤ម៉ឺននាក់។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៩ ខែតុលា ឆ្នាំ២០២០
