កងកម្លាំងយោធាសហរដ្ឋអាមេរិកបានរាយការណ៍ថាបានសម្លាប់សកម្មប្រយុទ្ធ និងជនស៊ីវិលចំនួន១៧នាក់នៅក្នុងការវាយប្រហារដោយយន្តហោះគ្មានមនុស្សបើកមួយស្ថិតនៅភាគពាយព្យប្រទេសស៊ីរីក្បែរព្រំដែនតួកគីដោយបានកំណត់គោលដៅទាំងនោះថាមេដឹកនាំទាំងនេះមានទំនាក់ទំនងជាមួយក្រុមអាល់កៃដា។
អ្នកនាំពាក្យរបស់បញ្ជាការកណ្តាលអាមេរិកឧត្ដមសេនីយ៍ Beth Riordan ដែលដកស្រង់សម្តីដោយសាព័ត៌មាន AFP បានរាយការណ៍កាលពីថ្ងៃសៅរ៍នេះថាកងកំលាំងសហរដ្ឋអាមេរិកបានធ្វើការវាយប្រហារប្រឆាំងនឹងកិច្ចប្រជុំរបស់ក្រុមមេដឹកនាំជាន់ខ្ពស់អាល់កៃដាស្ថិតនៅក្នុងប្រទេសស៊ីរីជិតទីក្រុង Idlib។
ការវាយប្រហាលើមេដឹកនាំអាល់កៃដាទាំងនេះនឹងធ្វើឱ្យរំខានដល់សមត្ថភាពរបស់អង្គការភេរវករក្នុងការធ្វើផែនការបន្ថែម និងអនុវត្តការវាយប្រហារជាសកលដែលគំរាមកំហែងដល់ពលរដ្ឋអាមេរិក ដៃគូទាំងឡាយ និងជនស៊ីវិលស្លូតត្រង់។
បើទោះបីជាអ្នកនាំពាក្យរបស់បញ្ជាការកណ្តាលអាមេរិកមិនបានបញ្ជាក់ពីចំនួនអ្នកដែលត្រូវបានសម្លាប់នៅក្នុងការវាយនេះ និងការវាយប្រហារអត្តឃាតនៅក្នុងប្រទេសស៊ីរីក៏ដោយក៏ក្រុមដែលមានមូលដ្ឋាននៅចក្រភពអង់គ្លេស អង្គការឃ្លាំមើលសិទ្ធិមនុស្សនៅស៊ីរីបាននិយាយថាយ៉ាងហោចណាស់ជនស៊ីវិលចំនួន៥នាក់ស្ថិតក្នុងចំណោមអ្នកដែលត្រូវបានសម្លាប់នៅក្នុងការវាយប្រហារដោយយន្តហោះគ្មានមនុស្សបើករបស់សហរដ្ឋអាមេរិក។
គួរបញ្ចាក់ថាក្រុមភេរវករផ្សេងទៀតរួមទាំងសម្ព័ន្ធមិត្តអាល់កៃដា ក្រុម Hurras al-Deen ក៏មានវត្តមាន និងសកម្មនៅក្នុងតំបន់នោះដែរ។
អ្នកប្រែសម្រួល៖ គល់ សេងហាក់
ប្រភពព័ត៌មានពី baghdadpost ចេញផ្សាយថ្ងៃទី ២៦ ខែតុលា ឆ្នាំ២០២០
