សេចក្តីថ្លែងការណ៍មួយបាននិយាយកាលពីថ្ងៃអាទិត្យនេះថាកងកម្លាំង Peshmergaរបស់ឃឺដដែលគាំទ្រដោយសម្ព័ន្ធភាពពិភពលោកដឹកនាំដោយសហរដ្ឋអាមេរិកបានធ្វើប្រតិបត្តិការបោសសំអាតលើភ្នំ Qarachogh នៅខាងក្រៅស្រុក Makhmour ភាគខាងត្បូងទីក្រុង Erbil។
សេចក្តីថ្លែងការណ៍បានបន្ថែមថាប្រតិបត្តិការនេះមានរយៈពេល ៤៨ ម៉ោងក្នុងកំឡុងពេលនោះ កងកម្លាំង Peshmerga ស្ថិតនៅលើដីបានស្វែងរករូងភ្នំចំនួន១៣កន្លែង ដែលសង្ស័យថាត្រូវបានប្រើប្រាស់ដោយពួកសកម្មប្រយុទ្ធ IS សម្រាប់លាក់ខ្លួន។
ចំណែកឯកងកម្លាំងសម្ព័ន្ធបានផ្តល់ការគាំទ្រពីលើអាកាសដល់កងកម្លាំង Peshmerga ក្នុងកំឡុងពេលប្រតិបត្តិការ។
លោក Hassan Nouri ប្រធានការិយាល័យប្រព័ន្ធផ្សព្វផ្សាយសម្រាប់អង្គភាព៨០របស់ Peshmerga បានបញ្ជាក់ប្រាប់បណ្តាញសារព័ត៌មាន BasNews ថាកងកម្លាំងបានបញ្ចប់ប្រតិបត្តិការនេះដោយសុវត្ថិភាពកាលពីថ្ងៃអាទិត្យនេះ ប៉ុន្តែលោកមិនបានបញ្ជាក់លម្អិតអំពីប្រតិបត្តិការ នេះទេ ថាតើមានការពាក់ព័ន្ធជាមួយក្រុមជីហាដដែរឬអត់។
អ្នកប្រែសម្រួល៖ គល់ សេងហាក់
ប្រភពព័ត៌មានពី baghdadpost ចេញផ្សាយថ្ងៃទី ០១ ខែវិច្ឆិកា ឆ្នាំ២០២០
