កម្លាំង CTS និយាយនៅថ្ងៃចន្ទថា កងកម្លាំងកុម្ម៉ង់ដូរបស់សេវាកម្មប្រឆាំងភេរវកម្មអ៊ីរ៉ាក់ (CTS) បានធ្វើប្រតិបត្តិការប្រឆាំងនឹងសមាជិកក្រុមសកម្មប្រយុទ្ធរបស់រដ្ឋអ៊ីស្លាមជ្រុលនិយម (IS) នៅភាគខាងត្បូងនៃខេត្ត Nineveh បណ្តាលឲ្យសមាជិកក្រុមសកម្មប្រយុទ្ធ IS ចំនួន០៦នាក់ស្លាប់។
សេវាកម្ម CTS និយាយនៅក្នុងសេចក្តីថ្លែងការណ៍មួយថា កងកម្លាំងកុម្ម៉ង់ដូ CTS គាំទ្រដោយយន្តហោះចម្រុះអន្តរជាតិដឹកនាំដោយសហរដ្ឋអាមេរិកធ្វើការវាយប្រហារលើរូងភ្នំដែលប្រើប្រាស់ដោយសមាជិកក្រុមសកម្មប្រយុទ្ធ IS នៅភ្នំ Makhmour នៅភាគខាងត្បូងនៃទីក្រុង Mosul ខេត្ត Nineveh ចម្ងាយប្រហែល៤០០គីឡូម៉ែត្រខាងជើងទីក្រុង Baghdad ។
ប្រភពព័ត៌មានបន្ថែមថា កងកម្លាំងទ័ពបានប៉ះទង្គិចគ្នាជាមួយសមាជិកក្រុមសកម្មប្រយុទ្ធជ្រុលនិយមនៅក្នុងរូងភ្នំអំកំឡុងពេលធ្វើប្រតិបត្តិការនិងបានសម្លាប់សមាជិកសកម្មប្រយុទ្ធ IS ចំនួន០៣នាក់ ខណៈដែលសមាជិកផ្សេងទៀតស្លាប់នៅក្នុងការវាយប្រហារតាមអាកាសរបស់កងកម្លាំងចម្រុះនៅពេលពួកគេព្យាយាមរត់គេចពីទីតាំងកើតហេតុ។ ប្រភពមួយផ្សេងទៀតបន្ថែមទៀតថា សមាជិកកងកម្លាំងមួយនៅក្នុងចំណោមកងកម្លាំង CTS បានរងរបួសអំឡុងពេលធ្វើប្រតិបត្តិការ។
តំបន់ភ្នំ និងតំបន់ជនបទដ៏ធំល្វឹងល្វើយនៅភាគខាងជើងរដ្ឋធានីបាកដាដរបស់ប្រទេសអ៊ីរ៉ាក់រងការវាយប្រហារពីសមាជិកក្រុមសកម្មប្រយុទ្ធ IS យ៉ាងខ្លាំងក្លានៅក្នុងរយៈពេលប៉ុន្មានខែកន្លងមកនេះ បើទោះបីជាមានប្រតិបត្តិការយោធាម្តងហើយម្តងទៀតដើម្បីតាមប្រមាញ់ពួកគេក៏ដោយ។
ស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរឡើងចាប់តាំងពីកងកម្លាំងសន្តិសុខអ៊ីរ៉ាក់បានកម្ចាត់សមាជិកក្រុមសកម្មប្រយុទ្ធ IS នៅទូទាំងប្រទេសចុងឆ្នាំ២០១៧ ។
ទោះជាយ៉ាងណាក៏ដោយ សមាជិកISនៅតែបង្កប់ខ្លួនក្នុងតំបន់ទីប្រជុំជន ឬតំបន់វាលខ្សាច់និងធ្វើការវាយឆ្មក់ជាញឹកញាប់ប្រឆាំងនឹងកងកម្លាំងសន្តិសុខ និងជនស៊ីវិល។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០១ ខែវិច្ឆិកា ឆ្នាំ២០២០
