មន្ត្រីយោធាបាននិយាយនៅថ្ងៃពុធម្សិលមិញនេះថា យ៉ាងហោចណាស់សមាជិកសកម្មប្រយុទ្ធអាល់សាបាប (al-Shabab) ចំនួន ១១នាក់ ត្រូវបានកងទ័ពសម្លាប់ និងចំនួន ០៦នាក់ផ្សេងទៀតរងរបួស នៅក្នុងការប្រយុទ្ធគ្នាយ៉ាងសាហាវមួយជាមួយកងទ័ពសូម៉ាលីនៅតំបន់ Lower Shabelle ភាគខាងត្បូងនៃប្រទេស កាលពីថ្ងៃអង្គារ។
លោក Mohamed Tahlil Bihi មេបញ្ជាការកងពលថ្មើរជើងសូម៉ាលី បានមានប្រសាសន៍ថា កងទ័ពសូម៉ាលីបានធ្វើប្រតិបត្តិការនៅក្នុងភូមិ Dahab, Gal Salimo និងភូមិ Garas Gawan។
លោក Bihi មានប្រសាសន៍ថា៖ “យើងសម្លាប់សមាជិកក្រុមសកម្មប្រយុទ្ធអាល់សាបាបចំនួន ១១នាក់ ដោយក្នុងនោះមានមេដឹកនាំជាន់ខ្ពស់ម្នាក់ និងបណ្តាលឱ្យសមាជិកចំនួន០៦នាក់ផ្សេងទៀតរងរបួសនៅក្នុងអំឡុងពេលប៉ះទង្គិចគ្នាយ៉ាងខ្លាំងជាមួយសាមាជិកអាល់សាបាប” ។
លោកបន្ថែមថា កងកម្លាំងទ័ពបានបំផ្លាញតំបន់ដែលគ្រប់គ្រងដោយពួកសកម្មប្រយុទ្ធ។ ឧប្បត្តិហេតុចុងក្រោយកើតឡើងខណៈពេលមានប្រតិបត្តិការសន្តិសុខជាប្រចាំធ្វើឡើងដោយកម្លាំងរដ្ឋាភិបាលប្រឆាំងនឹងសកម្មប្រយុទ្ធអាល់សាបាបនៅតំបន់ភាគខាងត្បូង៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៩ ខែធ្នូ ឆ្នាំ២០២០
