ប្រធានក្រុមប្រឹក្សាអធិបតេយ្យភាពរបស់ប្រទេសស៊ូដង់លោក Abdel Fattah Al-Burhan មានប្រសាសន៍នៅថ្ងៃចន្ទថា ការដកប្រទេសស៊ូដង់ចេញពីបញ្ជី «រដ្ឋឧបត្ថម្ភដល់អង្គភាពភេរវកម្ម» របស់សហរដ្ឋអាមេរិក ជាចំណែកមួយគាំទ្រដល់ចលនាប្រជាធិបតេយ្យ។
លោក Al-Burhan សរសេរលើគណនី Twitter ថា៖ “សេចក្តីសម្រេចចិត្តនេះនឹងចូលរួមចំណែកគាំទ្រដល់ចលនាប្រជាធិបតេយ្យ និងបង្កើនឱកាសដល់ភាពជោគជ័យនៃសម័យអន្តរកាល ក៏ដូចជាបង្កើតភាពរុងរឿងដល់ប្រជាជន ស៊ូដង់ផងដែរ”។
នៅព្រឹកថ្ងៃចន្ទ ស្ថានទូតសហរដ្ឋអាមេរិកប្រចាំនៅរដ្ឋធានី Khartoum បានប្រកាសជាផ្លូវការនូវការដកប្រទេសស៊ូដង់ចេញពីបញ្ជីរដ្ឋដែលគាំទ្រដល់អង្គភាពភេរវកម្ម។ នៅថ្ងៃទី១៩ ខែតុលាប្រធានាធិបតីអាមេរិកលោក Donald Trump មានប្រសាសន៍ថា លោកនឹងដកប្រទេស
ស៊ូដង់ចេញពីបញ្ជី ក្រោយពីប្រទេសស៊ូដង់បានចំណាយប្រាក់ ៣៣៥លានដុល្លារអាមេរិកជួយដល់ជនរងគ្រោះសហរដ្ឋអាមេរិក។
គួររំលឹកផងដែរថា សហរដ្ឋអាមេរិកបានចុះឈ្មោះប្រទេសស៊ូដង់នៅក្នុងបញ្ចីរដ្ឋដែលឧបត្ថម្ភដល់អង្គភាពភេរវកម្មនៅក្នុងឆ្នាំ១៩៩៣ ៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៤ ខែធ្នូ ឆ្នាំ២០២០
