ភ្នាក់ងារសារព័ត៌មានរដ្ឋ SANA រាយការណ៍ថា នៅថ្ងៃពុធ ទី៣០ បុរសប្រដាប់ដោយអាវុធម្នាក់វាយប្រហារលើរថយន្តក្រុងដឹកអ្នកដំណើរនៅតំបន់វាលខ្សាច់នៅភាគខាងកើតប្រទេសស៊ីរ៉ី ដោយបានសម្លាប់មនុស្សយ៉ាងហោចណាស់ចំនួន ២៥នាក់។
ប្រភពព័ត៌មានបញ្ជាក់ថា ភេរវករវាយប្រហារកំណត់គោលដៅលើរថយន្តក្រុងនៅលើផ្លូវ Palmyra-Deir al-Zour ក្នុងតំបន់ Kabajeb បណ្តាលឲ្យមនុស្សចំនួន ១៣នាក់ផ្សេងទៀតរងរបួស។
របាយការណ៍ជាផ្លូវការមិនទាន់បង្ហាញព័ត៌មានលម្អិតបន្ថែមទៀតទេ។
ក្រុមអ្នកសង្កេតការណ៍សិទ្ធិមនុស្សស៊ីរីបញ្ជាក់ថា សមាជិករដ្ឋអ៊ីស្លាម (IS) វាយប្រហារកំណត់គោលដៅលើរថយន្តក្រុងចំនួន០៣គ្រឿង ដែលកំពុងដឹកទាហាននៅតាមផ្លូវទៅកាន់ខេត្ត Deir al-Zour ភាគខាងកើតប្រទេសស៊ីរីនៅថ្ងៃពុធ ដោយបានសម្លាប់មនុស្សចំនួន០៣នាក់ និងបណ្តាលឲ្យមនុស្សចំនួន១១នាក់ផ្សេងទៀតរងរបួស។
ក្រោយពីបាត់បង់តំបន់សំខាន់ៗនៅទូទាំងប្រទេសស៊ីរី សមាជិកសកម្មប្រយុទ្ធ IS បានផ្លាស់ទីទៅនៅតាមតំបន់វាលខ្សាច់ភាគខាងកើតប្រទេសស៊ីរី ដោយពួកគេតែងតែធ្វើការវាយប្រហារប្រឆាំងនឹងបុគ្គលិកយោធា និងលើមូលដ្ឋានទ័ពជាច្រើន។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី៣១ ខែធ្នូ ឆ្នាំ២០២០
