នៅថ្ងៃអាទិត្យម្សិលមិញនេះយោធានិយាយថា កងកម្លាំងសន្តិសុខរដ្ឋាភិបាលអាហ្វហ្គានីស្ថានកម្ចាត់ការវាយប្រហាររបស់សមាជិកសកម្មប្រយុទ្ធនៅប៉ុស្តិ៍ត្រួតពិនិត្យសន្តិសុខនៅភាគខាងកើតខេត្ត Nangarhar និងសម្លាប់សមាជិកសកម្មប្រយុទ្ធចំនួន០៨នាក់ ហើយចំនួន០៦នាក់ផ្សេងទៀតរងរបួស។
កងកម្លាំង Selab 201 Corps លើកឡើងនៅក្នុងសេចក្តីថ្លែងការមួយថា៖“ការប៉ះទង្គិចគ្នាផ្ទុះឡើងក្រោយពីសមាជិកក្រុមសកម្មប្រយុទ្ធប្រដាប់ដោយកាំភ្លើងនិងរ៉ុក្កែត(RPGs)វាយប្រហារលើប៉ុស្តិ៍ត្រួតពិនិត្យរបស់កងកម្លាំងការពារជាតិ និងសន្តិសុខជាតិអាហ្វហ្គានីស្ថាននៅក្នុងស្រុក Bati Kot នៅភាគខាងកើតនៃទីរួមខេត្ត Jalalabad នៅថ្ងៃសៅរ៍” ។
នៅក្នុងសេចក្តីថ្លែងការណ៍បន្ថែមថា បុគ្គលិក ANDSF ដែលយាមប្រចាំនៅប៉ុស្តិ៍ត្រួតពិនិត្យប្រយុទ្ធតបតយ៉ាងមានប្រសិទ្ធភាពដោយបានបង្ខំឱ្យសមាជិកសកម្មប្រយុទ្ធរត់ចេញពីកន្លែងកើតហេតុ។ យ៉ាងណាមិញ កងកម្លាំង ANDSF នៅតែបន្តធ្វើការគ្រប់គ្រងមជ្ឈមណ្ឌលប្រជាជនអាហ្វហ្គានីស្ថាន ទីប្រជុំជននានា និងខេត្តទាំងអស់ចំនួន៣៤ខេត្ត ប៉ុន្តែសមាជិកក្រុមឧទ្ទាមតាលីបង់គ្រប់គ្រងផ្នែកធំៗនៅតំបន់ជនបទហើយថែមទាំងធ្វើការវាយប្រហារទ្រង់ទ្រាយធំប្រឆាំងនឹងទីក្រុង និងស្រុកមួយចំនួនក្នុងប្រទេសអាហ្វហ្គានីស្ថានម្តងហើយម្តងទៀត។
រហូតមកដល់ពេលនេះ សមាជិកសកម្មប្រយុទ្ធមិនទាន់ធ្វើការឆ្លើយតបទៅនឹងរបាយការណ៍នេះទេ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៣ ខែធ្នូ ឆ្នាំ២០២១
