មន្ត្រីនិយាយនៅថ្ងៃអាទិត្យថា ក្មាន់កាំភ្លើងមិនស្គាល់អត្តសញ្ញាណជាច្រើននាក់ធ្វើការបាញ់ប្រហារលើកម្មករអណ្តូងរ៉ែបណ្តាលឲ្យកម្មករចំនួន១១នាក់ស្លាប់ និងចំនួន០៣នាក់ផ្សេងទៀតរងរបួសនៅស្រុក Bolan ភាគនិរតីខេត្ត Balochistan ក្នុងប្រទេសប៉ាគីស្ថាន។
ស្នងការរងរបស់ទីក្រុង Bolan Murad Kasi និយាយថា សមាជិកសកម្មប្រយុទ្ធមិនស្គាល់អត្តសញ្ញាណចាប់ខ្លួនកម្មករដែលកំពុងធ្វើការនៅក្នុងអណ្តូងធ្យូងថ្មមួយនៅយប់ថ្ងៃសៅរ៍ហើយក្រោយមកសម្លាប់កម្មករទាំងនោះក្រោយពីនាំពួកគេទៅតំបន់មួយផ្សេងទៀត។
ប្រភពព័ត៌មានពីភ្នាក់ងារស៊ើបការណ៍សម្ងាត់ខេត្តប្រាប់ភ្នាក់ងារព័ត៌មាននៅក្នុងលក្ខខណ្ឌអនាមិកថា សមាជិកសកម្មប្រយុទ្ធបានដាក់ខ្នោះកម្មករ និងចងជើងរបស់ពួកគេមុនពេលបាញ់សម្លាប់ពួកគេ។
ចំណែកឯ កម្មកររងរបួសត្រូវគេបញ្ជូនទៅមន្ទីរពេទ្យក្បែរនោះ ប៉ុន្តែស្ថានភាពរបស់ពួកគេនៅមិនទាន់ដឹងយ៉ាងណានោះទេ ។
ការស៊ើបអង្កេតលើឧប្បត្តិហេតុកំពុងដំណើរការ។ យ៉ាងណាមិញ មិនទាន់មានក្រុមណាមួយ ឬបុគ្គលណាម្នាក់អះអាងពីការវាយប្រហារនេះនៅឡើយទេ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៣ ខែមករា ឆ្នាំ២០២១
