អាជ្ញាធរនៅក្នុងប្រទេសកាមេរូននិយាយថា នៅព្រឹកថ្ងៃពុធ ទី០៦ ខែមករានេះគ្រឿងផ្ទុះមួយផ្ទុះឡើងវាយប្រហារលើរថយន្តរបស់ទាហាន និងសម្លាប់ទាហានចំនួន៥នាក់ រួមទាំងជនស៊ីវិលចំនួន១នាក់។
ទាហានទាំងនោះស្ថិតនៅផ្នែកមួយនៃក្បួនរដ្ឋាភិបាលដែលធ្វើដំណើរទៅកាន់តំបន់ដាច់ស្រយាលនៃទីក្រុង Njikwa និង Ngie ដើម្បីផ្តល់ការតែងតាំងអនុតំបន់ថ្មី។ ការបំផ្ទុះនេះកើតឡើងនៅពេលពួកគេកំពុងធ្វើដំណើរវិលត្រឡប់មកពីពិធីតែងតាំងនោះ នេះបើយោងតាមការបញ្ចាក់ពីប្រធានផ្នែកទំនាក់ទំនងតំបន់ពាយ័ព្យលោកស្រី Louis Marie ។
ជនស៊ីវិលដែលស្លាប់នៅក្នុងហេតុការណ៍ផ្ទុះគឺជាមន្ត្រីរដ្ឋាភិបាល។ លោកស្រីអះអាងថា ភេរវករជាអ្នកសម្លាប់ជនស៊ីវិលទាំងនោះ។ លោកស្រីប្រើពាក្យភេរវរករគឺចង់សំដៅទៅដល់ក្រុមបំបែកខ្លួនប្រដាប់អាវុធដែលកំពុងធ្វើប្រតិបត្តិការនៅក្នុងតំបន់នោះ។
គួររំលឹកផងដែរថា ក្រុមបំបែកខ្លួនបានប៉ះទង្គិចគ្នាជាមួយកងកម្លាំងរដ្ឋាភិបាលចាប់តាំងពីឆ្នាំ២០១៧នៅក្នុងគោលបំណងបង្កើតប្រទេសឯករាជ្យមួយដោយនិយាយភាសាអង់គ្លេសនៅលើទឹកដីភាគពាយព្យ និងនិរតីក្នុងប្រទេសកាមេរូន៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៦ ខែមករា ឆ្នាំ២០២០
