យោធាអ៊ីរ៉ាក់និយាយថា នៅថ្ងៃអង្គារ ទី១២ ខែមករា មានការវាយប្រហារតាមអាកាសដឹកនាំដោយកងកម្លាំងសហរដ្ឋអាមេរិកលើទីតាំងលាក់ខ្លួនរបស់ឧទ្ទាម IS ក្នុងខេត្ត Kirkuk នៅភាគខាងជើងប្រទេសអ៊ីរ៉ាក់។ ការវាយប្រហារនោះសម្លាប់សមាជិឧទ្ទាមរដ្ឋអ៊ីស្លាម (IS) ចំនួន៧នាក់។
ការិយាល័យប្រព័ន្ធផ្សព្វផ្សាយនៃបញ្ជាការប្រតិបត្តិការចម្រុះ (JOC) លើកឡើងនៅក្នុងសេចក្តីថ្លែងការណ៍មួយថា យន្ដហោះចម្រុះអន្តរជាតិវាយប្រហារតាមអាកាសចំនួន២លើកនៅពេលព្រឹកព្រលឹមលើទីតាំងឧទ្ទាម IS ក្នុងតំបន់ Wadi al-Shay ។
នៅក្នុងសេចក្តីថ្លែងការណ៍ JOC បញ្ជាក់ថា នៅទីតាំងកើតហេតុ កងកម្លាំងសន្តិសុខអ៊ីរ៉ាក់រកឃើញសាកសពឧទ្ទាមចំនួន៧នាក់បន្ថែមទៀតលើផ្លូវរូងក្រោមដីចម្ងាយ១០ម៉ែត្រពីទីតាំងវាយប្រហារ ហើយក្រោយមកទៀតកងកម្លាំងបានវាយបំផ្លាញផ្លូវនោះចោល។
ក្រោយមកទៀត កម្លាំងទ័ពក៏បានរកឃើញទីតាំងលាក់ខ្លួនរបស់ឧទ្ទាម IS មួយផ្សេងទៀតដែលមានខ្សែក្រវ៉ាត់ផ្ទុះ និងឧបករណ៍បំផ្ទុះចល័ត។ គេសម្គាល់ឃើញថា តំបន់ភ្នំ និងតំបន់រឹងមាំមួយចំនួននៅភាគខាងជើងនៃរដ្ឋធានីអ៊ីរ៉ាក់បាកដាដ(Baghdad) មានសកម្មភាពរបស់សមាជិកឧទ្ទាម IS យ៉ាងខ្លាំងក្លានៅរយៈពេលប៉ុន្មានខែកន្លងមកនេះ បើទោះបីជាមានប្រតិបត្តិការយោធាម្តងហើយម្តងទៀតដើម្បីតាមប្រមាញ់ពួកគេក៏ដោយ។
គួររំលឹកផងដែរថា ស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរឡើងគួរឱ្យកត់សម្គាល់ ក្រោយពីកងកម្លាំងសន្តិសុខអ៊ីរ៉ាក់បានកម្ចាត់សមាជិកសកម្មប្រយុទ្ធ IS ជ្រុលនិយមនៅឆ្នាំ២០១។ ទោះជាយ៉ាងណាក៏ដោយ សមាជិកឧទ្ទាម IS ដែលនៅសេសសល់បានបង្កប់ខ្លួននៅតាមទីប្រជុំជន ឬវាលខ្សាច់ និងតំបន់រឹងមាំផ្សេងទៀតដោយធ្វើការវាយប្រហារឆ្មក់ជាញឹកញាប់ប្រឆាំងនឹងកងកម្លាំងសន្តិសុខ និងជនស៊ីវិល៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១២ ខែមករា ឆ្នាំ២០២១
