អ្នកឃ្លាំមើលសង្គ្រាមរាយការណ៍នៅថ្ងៃពុធថា កម្លាំងអ៊ីស្រាអែលវាយប្រហារប្រើគ្រាប់ម៉ីស៊ីលប្រឆាំងនឹងទីតាំងយោធាជាច្រើននៅភាគខាងកើតប្រទេសស៊ីរីនៅវេលាពាក់ក្រោយពីពេលកណ្តាលអធ្រាត្រ។ ការវាយប្រហារនោះសម្លាប់យុទ្ធជនចំនួន ៥៧នាក់។
ក្រុមអ្នកឃ្លាំមើលសិទិ្ធមនុស្សស៊ីរីនិយាយថា ការវាយប្រហារកំណត់គោលដៅលើទីតាំងរបស់កងកម្លាំងស៊ីរី និងយុទ្ធជនដែលគាំទ្រដោយអ៊ីរ៉ង់នៅក្នុងតំបន់ដែលលាតសន្ធឹងពីទីក្រុង Deir al-Zour ទៅដល់តំបន់ al-Bukamal នៅតាមព្រំដែនរវាងប្រទេសស៊ីរី និងប្រទេសអ៊ីរ៉ាក់។
អ្នកឃ្លាំមើលដែលមានមូលដ្ឋាននៅចក្រភពអង់គ្លេសបញ្ជាក់បន្ថែមថា យុទ្ធជនដែលស្លាប់ក្នុងការវាយប្រហារគឺជាទាហានស៊ីរី និងអ្នកប្រយុទ្ធគាំទ្រដោយអ៊ីរ៉ង់។ ជាមួយគ្នានេះដែរភ្នាក់ងារសារព័ត៌មានរដ្ឋ SANA ក៏បានរាយការណ៍អំពីការវាយប្រហាររបស់អ៊ីស្រាអែល ប៉ុន្តែដោយមិនបានផ្តល់ព័ត៌មានលម្អិតទេ៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៣ ខែមករា ឆ្នាំ២០២១
