ប្រភពយោធាប្រាប់ភ្នាក់ងារព័ត៌មានថា នៅថ្ងៃពុធ ទី១៣ ខែមករា មានការប៉ះទង្គិចគ្នារវាងកងកម្លាំងរដ្ឋាបាលយេម៉ែន ជាមួយនឹងក្រុមឧទ្ទាម Houthi នៅជិតខេត្ត Marib ភាគកណ្តាលប្រទេសយេម៉ែន។ ការប៉ះទង្គិចនេះសម្លាប់មនុស្សជាច្រើននាក់។
ប្រភពដដែលបន្ថែមក្នុងលក្ខខណ្ឌអនាមិកថា ការប៉ះទង្គិចគ្នាកើតឡើងនៅក្នុងស្រុក Jabal Murad នៅភាគខាងត្បូងខេត្ត Marib នៅពេលដែលកម្លាំងរដ្ឋាភិបាលដណ្តើមទីតាំងជាច្រើននៅជួរភ្នំ។ មួយវិញទៀត ទូរទស្សន៍ Houthi-al-Masirah ក៏បានចុះផ្សាយថា កម្លាំងចម្រុះដឹកនាំដោយអារ៉ាប៊ីសាអូឌីតដែលគាំទ្រកម្លាំងរដ្ឋាភិបាលយេម៉ែនបើកការវាយប្រហារតាមអាកាសទៅលើក្រុមអ្នកប្រយុទ្ធ Houthi នៅតំបន់ភ្នំក្នុងស្រុក Jabal Murad នៅថ្ងៃពុធ។
គួរបញ្ជាក់ផងដែរថា ស្រុក Jabal Murad គឺជាផ្នែកមួយដែលស្ថិតនៅជួរមុខរវាងកងកម្លាំង យេម៉ែន និងកម្លាំងប្រឆាំង ដែលទីនោះស្ថិតនៅក្នុង និងក្បែរខេត្តដែលស្ថិតក្រោមការគ្រប់គ្រងរបស់រដ្ឋាភិបាល ហើយវាមានចម្ងាយប្រហែល ១៧០គីឡូម៉ែត្រពីភាគខាងកើតនៃរដ្ឋធានីសាណា(Sanaa)ដែលកាន់កាប់ដោយហ៊ូទី (Houthi-held)។
គួររំលឹកផងដែរថា ប្រទេសយេម៉ែនបានធ្លាក់ចូលទៅក្នុងសង្គ្រាមស៊ីវិលចាប់តាំងពីចុងឆ្នាំ២០១៤ នៅពេលដែលក្រុមឧទ្ទាម Houthis គាំទ្រដោយអ៊ីរ៉ង់ធ្វើការដណ្តើមយកខេត្តជាច្រើននៅភាគខាងជើង និងបានបង្ខំឱ្យរដ្ឋាភិបាលដែលមានការទទួលស្គាល់ជាអន្តរជាតិប្រធានាធិបតីលោក Abd-Rabbu Mansour Hadi ចេញពីទីក្រុង Sanaa៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៤ ខែមករា ឆ្នាំ២០២១
