ប៉ូលិសនៅទីក្រុងកំពង់ផែ Karachi ភាគខាងត្បូងរបស់ប្រទេសប៉ាគីស្ថាននិយាយនៅថ្ងៃព្រហស្បតិ៍នេះថា កម្លាំងប៉ូលិសបានបង្ក្រាបសកម្មភាពភេរវកម្ម និងចាប់ខ្លួនជនសង្ស័យជាភេរវករចំនួន១នាក់ ដែលមានជាប់ទាក់ទងនឹងទីភ្នាក់ងារស៊ើបការណ៍បរទេស។
យោងតាមប្រភពព័ត៌មានពីលោក Fida Hussain Janwari ស្នងការជាន់ខ្ពស់រវបស់ប៉ូលិសក្នុងតំបន់ Keamari ក្នុងទីក្រុង Karachi បានអោយដឹងថា ប៉ូលិសធ្វើប្រតិបត្តការលើគោលដៅមួយ ដោយផ្អែកទៅលើការផ្តល់ជំនួយនៅតំបន់ Ittehad Town ក្នុងទីក្រុង Karachi នៅភាគខាងត្បូងខេត្ត Sindh។
មន្ត្រីនិយាយថា ប្រតិបត្តិការនេះធ្វើឡើងដោយមានការសហការជាមួយភ្នាក់ងារស៊ើបការណ៍សម្ងាត់របស់កងទ័ពប៉ាគីស្ថាន។ ប្រភពបន្ថែមថា ភេរវករដែលជាប់សង្ស័យបានចូលរួមក្នុងសកម្មភាពភេរវកម្មនៅក្នុងទីក្រុង។
មន្ត្រីរូបនោះបន្តថា ជនសង្ស័យបានគ្រោងធ្វើការវាយប្រហារភេរវកម្មនៅក្នុងទីក្រុង ហើយភ្លាមៗនោះសមត្ថកិច្ចចាប់ខ្លួនជនសង្ស័យបានទាន់ពេលវេលា ដែលជាការជួយសង្គ្រោះទីក្រុងឲ្យចេញពីគ្រោះមហន្តរាយមួយ។ ប៉ូលិសក៏បានដកហូតគ្រឿងផ្ទុះ គ្រាប់បែកដៃ អាវុធ និងសម្ភារៈសំខាន់ផ្សេងៗទៀតពីជនសង្ស័យ។
គួរបញ្ជាក់ផងដែរថា នៅសប្តាហ៍មុន អាជ្ញាធរប្រឆាំងភេរវកម្មជាតិ (National Counter Terrorism Authority) របស់ប្រទេសនេះបានចេញសេចក្តីជូនដំណឹងភេរវកម្មក្នុងទីក្រុង Karachi ដោយព្រមានថា ក្រុមភេរវករដែលគាំទ្រដោយទីភ្នាក់ងារបរទេសមានផែនការវាយប្រហារលើអង្គភាពសំខាន់ៗរបស់រដ្ឋាភិបាល។
ក្រោយពីមានការជូនដំណឹង អាជ្ញាធរបង្កើនការប្រុងប្រយ័ត្នផ្នែកសន្តិសុខជាពិសេសនៅក្បែរអគារ និងអង្គភាពសំខាន់ៗរបស់រដ្ឋាភិបាល ៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៤ ខែមករា ឆ្នាំ២០២១
