ប្រភពព័ត៌មានពីភ្នាក់ងារស៊ើបការណ៍សម្ងាត់និយាយនៅថ្ងៃព្រហស្បតិ៍ថា មានហេតុការណ៍បំផ្ទុះគ្រឿងផ្ទុះមួយកើតឡើងក្នុងស្រុក Sibi នៅខេត្ត Balochistan ភាគនិរតីនៃប្រទេសប៉ាគីស្ថាន។ ហេតុការណ៍នោះសម្លាប់ទាហានចំនួន៤នាក់ និងបណ្តាលឲ្យទាហានចំនួន៥នាក់ផ្សេងទៀតរងរបួស។
ហេតុការណ៍នោះកើតឡើងនៅរសៀលថ្ងៃពុធ។ ប្រភពដដែលប្រាប់ភ្នាក់ងារព័ត៌មានដោយមិនបញ្ចេញឈ្មោះថា ក្រោយពីមន្ត្រីនៃអង្គភាពប៉ូលិសព្រំដែនបានបំពេញការងារឈូសឆាយផ្លូវសម្រាប់ការបង្កើតប៉ុស្តិ៍ត្រួតពិនិត្យថ្មីមួយ ដើម្បីចាប់ភេរវករ និងត្រួតពិនិត្យយានយន្តនៅក្នុងតំបន់ ពួកគេរងការវាយប្រហារពីគ្រឿងផ្ទុះដែលបង្កប់នៅលើដងផ្លូវ។
ទាហានរងរបួសត្រូវបញ្ជូនតាមយន្តហោះទៅកាន់ទីរួមខេត្ត Quetta។ ប្រភពដដែលបន្ថែមទៀតថា កងកម្លាំងរំដោះនៅក្នុងខេត្ត Balochistan ខុសច្បាប់អះអាងទទួលខុសត្រូវចំពោះការវាយប្រហារនោះដោយនិយាយថា សមាជិកសកម្មប្រយុទ្ធដែលវាយប្រហារលើកងកម្លាំងសន្តិសុខបានធ្វើការបំផ្ទុះគ្រាប់បែកដោយបញ្ជាចេញពីចម្ងាយ។
ថ្មីៗនេះរលកនៃអំពើភេរវកម្មកើនឡើងជាថ្មីនៅខេត្ត Balochistan ក្នុងប្រទេសប៉ាគីស្ថានដោយកត្តានោះបង្ហាញពីការកើនឡើងនៃការវាយប្រហារភេរវកម្មទៅលើកងកម្លាំងសន្តិសុខ និងជនស៊ីវិលនៅក្នុងរយៈពេលពីរខែចុងក្រោយនេះ។ ក្រោយពីមានឧប្បត្តិហេតុភេរវកម្មកើតឡើងមន្ត្រីរដ្ឋាភិបាលមូលដ្ឋានបើកប្រតិបត្តិការទូទាំងខេត្តមួយដើម្បីចាប់សមាជិកនៃក្រុមភេរវករនៅដើមខែនេះ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២១ ខែមករា ឆ្នាំ២០២០១
