រដ្ឋមន្ត្រីសុខាភិបាលអ៊ីរ៉ាក់លោក Hassan al-Tamimi មានប្រសាសន៍ថា យ៉ាងហោចណាស់មានមនុស្សចំនួន៣២នាក់ស្លាប់ និងចំនួន១១០នាក់ផ្សេងទៀតរងរបួសក្នុងហេតុការណ៍បំផ្ទុះគ្រាប់បែកអត្តឃាតនៅថ្ងៃព្រហស្បតិ៍ក្នុងទីក្រុងបាកដាដនៃប្រទេសអ៊ីរ៉ាក់។
នៅក្នុងសេចក្តីថ្លែងការណ៍មួយលោក al-Tamimi អះអាងថា មន្ទីរពេទ្យនៅក្នុងទីក្រុងបាកដាដទទួលបានសាកសពចំនួន៣២នាក់រីឯអ្នករងរបួសមានចំនួន១១០នាក់។ លោកបន្ថែមថា អ្នករងរបួសភាគច្រើនទទួលការព្យាបាលរួចហើយហើយចាកចេញពីមន្ទីរពេទ្យ ដោយនៅសល់តែចំនួន៣៦នាក់ទៀតប៉ុណ្ណោះដែលនៅសម្រាកព្យាបាលបន្ត។
ដំបូងមានការវាយប្រហារបំផ្ទុះគ្រាប់បែកអត្តឃាតដោយប្រើខ្សែរក្រវ៉ាត់ភ្ជាប់គ្រឿងផ្ទុះកើតឡើង ហើយក្រោយមកទៀតមានការបំផ្ទុះគ្រាប់បែកអត្តឃាតមួយផ្សេងទៀតក្នុងផ្សារតែមួយនៅក្នុងតំបន់ Bab al-Sharji ។
ពុំទាន់មានក្រុមណាមួយអះអាងទទួលខុសត្រូវចំពោះការវាយប្រហារនេះទេ ប៉ុន្តែភាគច្រើនក្រុមរដ្ឋអ៊ីស្លាមជ្រុលនិយម (IS) ជាអ្នកអះអាងទទួលខុសត្រូវចំពោះការវាយប្រហារអត្តឃាតដែលកំណត់គោលដៅលើកងកម្លាំងសន្តិសុខ និងនៅតំបន់ដែលមានមនុស្សច្រើនដោយមានទាំងនៅផ្សារ ហាងកាហ្វេ និងវិហារអ៊ីស្លាមនៅទូទាំងប្រទេសអ៊ីរ៉ាក់។
សូមបញ្ជាក់ផងដែរថា នៅក្នុងរយៈពេលជាច្រើនខែកន្លងមកនេះ ការបំផ្ទុះគ្រាប់បែកអត្តឃាតគឺកម្រមានណាស់នៅទីក្រុងបាកដាដដោយសារតែស្ថានភាពសន្តិសុខមានភាពប្រសើរឡើងនៅក្នុងប្រទេសអ៊ីរ៉ាក់ចាប់តាំងពីកងកម្លាំងសន្តិសុខអ៊ីរ៉ាក់កម្ចាត់ក្រុមសកម្មប្រយុទ្ធ IS នៅទូទាំងប្រទេសនៅចុងឆ្នាំ២០១៧។
ទោះជាយ៉ាងណា ឧប្បត្តិហេតុដែលអាចសម្លាប់មនុស្សជាច្រើននៅតែកើតមាននៅក្នុងប្រទេសដែលកំពុងរងការហែកហួរពីសង្គ្រាមខណៈ ដែលសំណល់សមាជិកឧទ្ទាម IS បានបង្កប់ខ្លួននៅក្នុងតំបន់ទីក្រុង ឬវាលខ្សាច់ និងតំបន់ដែលរឹងមាំផ្សេងទៀតដោយធ្វើការវាយប្រហារឆ្មក់ជាញឹកញាប់ប្រឆាំងនឹងកម្លាំងសន្តិសុខ និងជនស៊ីវិល៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២១ ខែមករា ឆ្នាំ២០២១
