ប្រភព Houthi ប្រាប់ភ្នាក់ងារព័ត៌មានថា នៅថ្ងៃអាទិត្យ ទី២៤ ខែមករា កងកម្លាំងអារ៉ាប៊ីសាអូឌីតវាយប្រហារតាមអាកាសនៅខេត្ត Marib ក្នុងប្រទេសយេម៉ែន។ ការវាយប្រហារនោះសម្លាប់សមាជិកឧទ្ទាមចំនួន៣៤នាក់។
ប្រភពឧទ្ទាមនៅតំបន់ Sirwah និយាយថា ការវាយប្រហារតាមអាកាសបានវាយប្រហារទៅលើអ្នកប្រយុទ្ធ Houthi នៅក្នុងស្រុក Sirwah ខណៈពេលដែលពួកគេទាំងនោះកំពុងស្ថិតនៅខាងក្រោយរថយន្តយោធាចំនួន៣គ្រឿង ដែលធ្វើដំណើរឆ្ពោះទៅមុខ។
ទូរទស្សន៍ Houthi-al-Masirah រាយការណ៍ផងដែរថា ការវាយប្រហារតាមអាកាសរបស់កម្លាំងចម្រុះធ្វើឡើងនៅក្នុងស្រុក Sirwah ភាគខាងកើតខេត្ត Marib ដោយប្រភពនេះមិនបានផ្តល់ព័ត៌មានលម្អិតអ្វីបន្ថែមទៀតនោះទេ។
ខេត្ត Marib ជាតំបន់ផលិតហ្គាសមានចម្ងាយប្រហែល១៧៣គីឡូម៉ែត្រពីភាគខាងកើតនៃរដ្ឋធានី Sanaa ដោយតំបន់នោះស្ថិតនៅក្រោមការគ្រប់គ្រងរបស់រដ្ឋាភិបាលយេម៉ែនខណៈដែលក្រុមឧទ្ទាមHouthi បានព្យាយាមធ្វើដំណើរឆ្ពោះទៅស្រុកមួយចំនួននៅភាគខាងកើត និងភាគខាងត្បូងនៃប្រទេស។
គួរំលឹកផងដែរថា ប្រទេសយេម៉ែនធ្លាក់ទៅក្នុងសង្គ្រាមស៊ីវិលចាប់តាំងពីចុងឆ្នាំ២០១៤ នៅពេលដែលកងកម្លាំងជីវពល Houthi គាំទ្រដោយអ៊ីរ៉ង់ធ្វើការកាន់កាប់ខេត្តមួយចំនួននៅភាគខាងជើង និងបានបង្ខំឱ្យរដ្ឋាភិបាលដែលមានការទទួលស្គាល់ពីអន្តរជាតិប្រធានាធិបតីលោក Abd-Rabbu Mansour Hadi ចេញពីតំបន់ Sanaa។ លើសពីនេះ
សម្ព័ន្ធអារ៉ាប់បានចាប់ផ្តើមធ្វើអន្តរាគមន៍នៅក្នុងជម្លោះប្រទេសយេម៉ែនចាប់ពីឆ្នាំ២០១៥ ដើម្បីគាំទ្ររដ្ឋាភិបាល Hadi ៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៥ ខែមករា ឆ្នាំ២០២១
