មេបញ្ជាការប៉ូលិសនៅក្នុងរដ្ឋធានីមានប្រសាសន៍នៅថ្ងៃចន្ទថា អាជ្ញាធរប្រទេសកេនយ៉ាកំពុងធ្វើការសាកសួរចម្លើយលើជនសង្ស័យជាភេរវករម្នាក់ ដែលសមត្ថកិច្ចចាប់ខ្លួនជនសង្ស័យនោះបានជាមួយនឹងរូបថតរបស់ស្ថានីយ៍ប៉ូលិស ស្ថានទូត និងអាគារផ្សេងៗទៀតនៅក្នុងទីក្រុង Nairobi។
មេបញ្ជាការប៉ូលិសក្រុង Nairobi លោក Rashid Yakub មានប្រសាសន៍ថា សមត្ថកិច្ចចាប់ខ្លួនលោក Augustine Juma នៅថ្ងៃអាទិត្យ ទី២៤ ខែមករានេះ ដោយបានរកឃើញវីដេអូឃ្លីបខ្លីរបស់គាត់ដែលក្នុងវីដេអូរនោះគាត់បានធ្វើទារុណកម្មលើបុរសម្នាក់ទៀតដោយដាក់ខ្នោះ។
មេបញ្ជាការរូបនោះអះអាងថា ជនសង្ស័យមានអាយុ៣៤ឆ្នាំជាជនជាតិកេនយ៉ាត្រូវសមត្ថកិច្ចប្រគល់ទៅអង្គភាពប៉ូលិសប្រឆាំងភេរវកម្ម។ លោក Yakub បន្តថា គេរកឃើញរូបភាពមួយចំនួនដូចជារូបធនាគារកណ្តាលនៃប្រទេសកេនយ៉ា ការិយាល័យកណ្តាលស៊ើបអង្កេតឧក្រិដ្ឋកម្ម ស្ថានទូតអ៊ីស្រាអែល និងស្ថានីយប៉ូលិសជាច្រើននៅទីក្រុង Nairobi នៅក្នុងទូរស័ព្ទដៃរបស់លោក Juma ។ លោកមានប្រសាសន៍ថា៖
“យើងមិនដឹងថាគាត់មានចេតនាអ្វីនោះទេ ប៉ុន្តែយើងនឹងដឹងបន្ថែមទៀតនៅក្នុងដំណើរការនៃការសួរចម្លើយ” ។
លោក Yakub បន្ថែមថា គេថែមទាំងបានរកឃើញរូបភាពមន្ត្រីប៉ូលិសកេនយ៉ានៅក្នុងការហ្វឹកហាត់ហ្វឹកហាត់ផ្សេងៗ និងរូបភាពពលរដ្ឋកេនយ៉ាដែលត្រូវក្រុម al-Shabab សម្លាប់ និងក្រុមប្រដាប់អាវុធជាប់សង្ស័យជាក្រុមសកម្មប្រយុទ្ធ។
អ្នកស៊ើបអង្កេតដែលចាប់បានជនសង្ស័យនិយាយថា អ្នកស៊ើបអង្កេតចង់និយាយជាមួយមិត្តភក្តិ និងសាច់ញាតិរបស់ជនសង្ស័យ ដែលនោះជាផ្នែកមួយនៃកិច្ចខិតខំប្រឹងប្រែងរបស់ក្រុមអ្នកស៊ើបអង្កេតដើម្បីស្វែងយល់ពីសាវតារបស់ជនសង្ស័យដូចជាថាតើគាត់បានចំណាយពេលនៅប្រទេសសូម៉ាលីដែរឬយ៉ាងណា។ ប៉ូលិសនិយាយថា ពួកគេបានរំខានដល់ការវាយប្រហារភេរវកម្មដែលបានគ្រោងទុកជាច្រើននៅក្នុងប្រទេស។
គួរបញ្ជាក់ផងដែរថា ប្រទេសកេនយ៉ាមានការប្រុងប្រយ័ត្នខ្ពស់ក្នុងការប្រឆាំងជាមួយនឹងការគំរាមកំហែងភេរវកម្មដែលបង្កឡើងដោយសមាជិកសកម្មប្រយុទ្ធ Shabab ដែលមានទំនាក់ទំនងជាមួយក្រុម al-Qaida។ ក្រុម al-Qaida ជាញឹកញាប់ធ្វើការវាយប្រហារនៅភាគឥសាននៃប្រទេសកេនយ៉ាជាពិសេសនៅតំបន់ Mandera និង Garissa ដែលមានព្រំប្រទល់ជាប់ប្រទេសសូម៉ាលី ដោយសម្លាប់ជនស៊ីវិល និងបុគ្គលិកសន្តិសុខជាច្រើននាក់៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៥ ខែមករា ឆ្នាំ២០២១
