ក្រុមឧទ្ទាម Houthi យេម៉ែននិយាយថា នៅថ្ងៃចន្ទ ទី២៥ ខែមករា យន្តហោះចម្បាំងរបស់កម្លាំងចម្រុះដឹកនាំដោយអារ៉ាប៊ីសាអូឌីតបើកការវាយប្រហារតាមអាកាសសរុបចំនួន១៨លើកលើយុទ្ធជន Houthi នៅក្នុងខេត្ត Marib នៃប្រទេសយេម៉ែន។
ប្រភពទូរទស្សន៍ Houthi-al-Masirah ចុះផ្សាយថា ការវាយប្រហារតាមអាកាសកំណត់គោលដៅលើទីតាំងជាច្រើននៅក្នុងស្រុក Sirwah ភាគខាងលិចនៃខេត្ត Marib ដោយប្រភពនេះពុំបានផ្តល់ព័ត៌មានលម្អិតទេ។ អ្នកស្រុកប្រាប់ភ្នាក់ងារព័ត៌មានថា៖“ការវាយប្រហារតាមអាកាសកំណត់គោលដៅលើកម្លាំងយោធារបស់ឧទ្ទាម Houthi នៅតាមដងផ្លូវវាលខ្សាច់ នៅឃ្លាំងអាវុធលើភ្នំ និងទីតាំងយោធាដទៃទៀតរបស់ក្រុមឧទ្ទាម” ។
ប្រភពសន្តិសុខ Houthi ក្នុងតំបន់បញ្ជាក់ថា ការវាយប្រហារតាមអាកាសធ្វើឡើងក្រោយពីមានការវាយប្រហារតាមអាកាសផ្សេងទៀតនៅលើស្រុកតែមួយដោយបានសម្លាប់សមាជិកក្រុមឧទ្ទាម Houthi យ៉ាងហោចណាស់ចំនួន៣៤នាក់។
ខេត្ត Marib ជាខេត្តផលិតហ្គាស និងមានទីតាំងនៅចម្ងាយប្រហែល ១៧៣គីឡូម៉ែត្រពីភាគខាងកើតនៃរដ្ឋធានី Sanaa ដោយតំបន់នោះស្ថិតនៅក្រោមការគ្រប់គ្រងរបស់រដ្ឋាភិបាលយេម៉ែនខណៈដែលក្រុមឧទ្ទាមHouthi ព្យាយាមធ្វើដំណើរឆ្ពោះទៅស្រុកមួយចំនួននៅភាគខាងកើត និងភាគខាងត្បូងនៃប្រទេស។
គួរំលឹកផងដែរថា ប្រទេសយេម៉ែនធ្លាក់ទៅក្នុងសង្គ្រាមស៊ីវិលចាប់តាំងពីចុងឆ្នាំ២០១៤ នៅពេលដែលកងកម្លាំងជីវពល Houthi គាំទ្រដោយអ៊ីរ៉ង់ធ្វើការកាន់កាប់នៅខេត្តមួយចំនួននៅភាគខាងជើង និងបង្ខំឱ្យរដ្ឋាភិបាលដែលមានការទទួលស្គាល់ពីអន្តរជាតិប្រធានាធិបតីលោក Abd-Rabbu Mansour Hadi ចេញពីតំបន់ Sanaa។ លើសពីនេះ សម្ព័ន្ធអារ៉ាប់ចាប់ផ្តើមធ្វើអន្តរាគមន៍ក្នុងជម្លោះប្រទេសយេម៉ែនចាប់ពីឆ្នាំ២០១៥ ដើម្បីគាំទ្ររដ្ឋាភិបាល Hadi ៕
