សមាជិកក្រុមប្រឹក្សាខេត្តលោក Mohammad Nasir Nazari មានប្រសាសន៍ថា នៅថ្ងៃអង្គារ ទី២៦ ខែមករា មានគ្រាប់ម៉ីស៊ីលចំនួន១០គ្រាប់បាញ់ចូលទៅទីក្រុង Qala-e-Naw ក្នុងប្រទេសអាហ្វហ្គានីស្ថាន។ ហេតុការណ៍នោះបណ្តាលឲ្យជនស៊ីវិលចំនួន៩នាក់រងរបួស។
លោក Nazari ចោទប្រកាន់លើក្រុមសកម្មប្រយុទ្ធតាលីបង់ ដោយអះអាងថា ក្រុមសកម្មប្រយុទ្ធជាអ្នកបាញ់មីស៊ីលទៅលើតំបន់លំនៅដ្ឋាននៅរសៀលថ្ងៃអង្គារ បណ្តាលឲ្យជនស៊ីវិលចំនួន៩នាក់រងរបួស។
ប៉ូលិសបញ្ជាក់ពីឧប្បត្តិហេតុផងដែរ ប៉ុន្តែពុំផ្តល់ព័ត៌មានលម្អិតបន្ថែមទៀតទេ។ ចំណែកឯប្រធានមន្ទីរសុខាភិបាលខេត្តលោក Abdul Latif Rostae បញ្ជាក់ថា ជនស៊ីវិលដែលរងរបួសចំនួនទាំង៩នាក់រួមមានកុមារចំនួន១នាក់ត្រូវគេបញ្ជូនទៅសម្រាកព្យាបាលនៅមន្ទីរពេទ្យ។
ចំណែក ក្រុមសកម្មប្រយុទ្ធតាលីបង់ដែលមានសកម្មភាពនៅក្នុងផ្នែកខ្លះក្នុងខេត្ត Badghis និងខេត្ត Qala-e-Naw ពុំទាន់ធ្វើការអត្ថាធិប្បាយអ្វីទាក់ទងនឹងហេតុការណ៍នេះទេ៕
ប្រែសម្រួល៖ Pouk Leakhena
ប្រភពព័ត៌មាន xinhuanet ចុះផ្សាយថ្ងៃ២៦ ខែមករា ឆ្នាំ២០២១
