នៅថ្ងៃអង្គារ ទី១៦ ខែមករា កងទ័ពជាតិសូម៉ាលី (SNA) សម្លាប់សមាជិកសកម្មប្រយុទ្ធ al-Shabab ចំនួន៧នាក់នៅក្នុងប្រតិបត្តិការនៅភាគខាងជើងរាជធានី Baidoa នៅភាគនិរតីនៃប្រទេសសូម៉ាលី។
លោក Amin Mohamed Darur មេបញ្ជាការប៉ូលិសនៅរាជធានី Baidoa ប្រាប់អ្នកកាសែតថា កងទ័ពជាតិ SNA និងកងកម្លាំងរដ្ឋភាគនិរតីធ្វើប្រតិបត្តិការរួមគ្នាប្រឆាំងនឹងយុទ្ធជន
al-Shabab ក្រោយពីទទួលបានជំនួយពីអ្នកស្រុក។ លោក Darur មានប្រសាសន៍ថា៖ “SNA និងកងកម្លាំងរដ្ឋនៅភាគនិរតីសម្លាប់ភេរវករ al-Shabab ចំនួន៧នាក់ និងបណ្តាលឲ្យភេរវករជាច្រើននាក់ផ្សេងទៀតរងរបួសនៅក្នុងតំបន់ដែលមានចម្ងាយ៣៥គីឡូម៉ែត្រនៅភាគខាងជើងក្រុងBaidoaក្នុងតំបន់ Bay នៅព្រឹកនេះ។ ប្រតិបត្តិការនោះទទួលបានជោគជ័យយ៉ាងខ្លាំង។
មេបញ្ជាការយោធារូបនេះពុំបានបញ្ជាក់ឲ្យច្បាស់ទេថា មានកងកម្លាំងចម្រុះសូម៉ាលីចំនួនប៉ុន្មានអ្នកដែលស្លាប់ និងរបួសនៅពេលដែលប្រយុទ្ធជាមួយសកម្មប្រយុទ្ធal-Shabab។
ចំណែកឯ ក្រុមសកម្មប្រយុទ្ធal-Shabab ពុំបាននិយាយអ្វីទាក់ទងទៅនឹងការវាយលុករបស់យោធានៅលើកចុងក្រោយនេះទេ ប៉ុន្តែពួកគេធ្លាប់អះអាងថា សមាជិករបស់ពួកគេវាយប្រហារលើមូលដ្ឋានកងទ័ពអាហ្វ្រិក និងសហភាពសូម៉ាលីនៅក្នុងតំបន់ Bay និងតំបន់ Bakool៕
ប្រែសម្រួល៖ Pouk Lekahena
ប្រភពព័ត៌មាន Xinhua ចុះផ្សាយថ្ងៃទី២២ ខែមករា ឆ្នាំ២០២១
