នៅថ្ងៃទី២៦ ខែមករា ប្រទេសឥណ្ឌាប្រារព្វពិធីអបអរសាទរខួបលើកទី៧២នៃការប្រកាសសាធារណរដ្ឋរបស់ខ្លួនខណៈដែលប្រទេសនេះបានបំពេញនូវសមិទ្ធិផលសំខាន់ៗក្នុងការអភិវឌ្ឍន៍ និងការកសាងសេដ្ឋកិច្ចតាមរយៈការលើកកម្ពស់ជំហរអន្តរជាតិរបស់ខ្លួន។
គួរបញ្ជាក់ផងដែរថា ទំនាក់ទំនងរវាងប្រទេសស៊ីរី និងប្រទេសឥណ្ឌាកាន់តែល្អខ្លាំងថែមទៀតនៅលើគ្រប់វិស័យទាំងផ្នែកនយោបាយ សេដ្ឋកិច្ច និងវប្បធម៌ ដោយសារតែប្រទេសឥណ្ឌាបានរក្សាជំហររបស់ខ្លួននៅក្នុងការគាំទ្រដល់ប្រទេសស៊ីរីនៅពេលមានវិបត្តិក្នុងការប្រឆាំងនឹងអំពើរភេរវកម្មក៏ដូចជាជំហរគោលរបស់ខ្លួនក្នុងការគោរពអធិបតេយ្យភាព និងបូរណភាពទឹកដីរបស់ប្រទេសស៊ីរី។
ប្រទេសឥណ្ឌាតែងតែប្តេជ្ញាចិត្តស្វែងរកដំណោះស្រាយនយោបាយចំពោះវិបត្តិនេះ និងបដិសេធការជ្រៀតជ្រែកពីបរទេសក្នុងកិច្ចការផ្ទៃក្នុងរបស់ប្រទេស។ ប្រទេសឥណ្ឌាអះអាងម្តងហើយម្តងទៀតនូវបំណងរបស់ខ្លួនក្នុងការបង្កើនកិច្ចសហប្រតិបត្តិការជាមួយប្រទេសស៊ីរីជាពិសេសនៅក្នុងដំណើរការកសាងប្រទេសឡើងវិញ។
គួររំលឹកផងដែរថា ប្រទេសឥណ្ឌាបានបញ្ជូនជំនួយមនុស្សធម៌ជាពិសេសនៅក្នុងវិស័យសុខាភិបាល និងបានបើកដំណើរការកន្លែងដំឡើងអវយវៈសិប្បនិម្មិតសម្រាប់អ្នករងរបួសពីសង្គ្រាមចំនួនច្រើនជាង៥០០នាក់បន្ថែមលើការផ្តល់ជំនួយវេជ្ជសាស្ត្រដើម្បីទប់ទល់នឹងការគំរាមកំហែងនៃជំងឺរាតត្បាតមេរោគកូរ៉ូណា(ជំងឺកូវីត១៩) ។
សូមបញ្ជាក់បន្ថែមផងដែរថា ប្រទេសដែលមានចំណងមិត្តភាពល្អទាំងពីរ មិនបញ្ឈប់ការផ្តល់អាហារូបករណ៍ និងវគ្គបណ្តុះបណ្តាលដល់បុគ្គលិកស៊ីរីនូវជំនាញផ្សេងៗ ពីព្រោះសិក្ខាកាមដែលទទួលជោគជ័យពីការបណ្តុះបណ្តាលមានចំនួនកើនពី៧០នាក់ឡើងទៅដល់១០០នាក់នៅរយៈពេលប៉ុន្មានឆ្នាំចុងក្រោយនេះបន្ថែមលើអាហារូបករណ៍ដែលធ្លាប់ផ្តល់ឲ្យនៅឆ្នាំ២០១៨ដល់និស្សិតស៊ីរីមានចំនួនកើនឡើងច្រើនជាងមួយពាន់នាក់សម្រាប់វិស័យផ្សេងៗទៀត៕
ប្រែសម្រួល៖Pouk Leakhena
ប្រភពព័ត៌មាន SANA ចុះផ្សាយថ្ងៃទី២៥ ខែមករា ឆ្នាំ២០២១