ស្លាប់៣នាក់​របួស ១៣នាក់​ក្នុង​ហេតុការណ៍​ផ្ទុះ​គ្រាប់បែក​នៅក្នុង​ប្រទេស​អា​ហ្វ​ហ្គា​នី​ស្ថាន

អាជ្ញាធរ​និយាយ​នៅ​ថ្ងៃ​ពុធ ទី២៧ ខែមករា​ថា មាន​ហេតុការណ៍​បំផ្ទុះ​គ្រាប់បែក​ចំនួន​ពីរ​កើតឡើង​នៅ​ទីតាំង​ចំនួន​ពីរ​កន្លែង​ផ្សេងគ្នា​ដោយ​បណ្តាល​ឲ្យ​មនុស្ស​ចំនួន៣នាក់​ស្លាប់​និង​ចំនួន១៣នាក់​ផ្សេងទៀត​រងរបួស​នៅក្នុង​ប្រទេស​អា​ហ្វ​ហ្គា​នី​ស្ថាន។

អ្នកនាំពាក្យ​ប៉ូលិស​ទីក្រុង​កា​ប៊ុល​លោក Ferdaus Faramarz ប្រាប់​ភ្នាក់ងារ​សារព័ត៌មាន​ថា​នៅក្នុង​ទីក្រុង​កា​ប៊ុល​មាន​មន្ត្រីប៉ូលិស​ចំនួន២នាក់​រងរបួស​ស្រាល​នៅពេលដែល​គ្រឿងផ្ទុះ (IED) វាយប្រហារ​លើ​រថយន្ត​ដឹកទំនិញ​មួយគ្រឿង​នៅ​តំបន់ Police District ១៥ នៅ​ព្រឹក​ថ្ងៃ​ពុធ​សប្តាហ៍​នេះ។

លោក​មានប្រសាសន៍ថា គ្រឿងផ្ទុះ IED ទំនងជា​បំផ្ទុះ​ដោយមាន​ការបញ្ជា​ពី​ចម្ងាយ ហើយ​ក្រុម​ជំនាញ​របស់​នាយកដ្ឋាន​ស៊ើបអង្កេត​ព្រហ្មទណ្ឌ​ប៉ូលិស​កំពុងតែធ្វើការ​ស៊ើបអង្កេត​លើ​ករណីនេះ។ លើសពីនេះ នៅ​ភាគខាងត្បូង​ខេត្ត Uruzgan មាន​មន្ត្រីប៉ូលិស​ចំនួន២នាក់ និង​ជន​ស៊ីវិល​ចំនួន១នាក់​ស្លាប់ រួមទាំង​មាន​ជន​ស៊ីវិល​ចំនួន១០នាក់​ផ្សេងទៀត និង​ប៉ូលិស​ចំនួន១នាក់​រងរបួស​នៅក្នុង​ហេតុការណ៍​បំផ្ទុះ​ស្រដៀង​គ្នា​នេះ​នៅ​យប់​ថ្ងៃ​អង្គារ។

លោក Mohammad Omar Shirzad អភិបាលខេត្ត Tirin Kot បញ្ជាក់ប្រាប់​ភ្នាក់ងារ​សារព័ត៌មាន​ថា រថយន្ត​ដឹកទំនិញ​របស់​មន្ត្រីប៉ូលិស​រង​ការបំផ្លាញ​ពី​ហេតុការណ៍​ផ្ទុះ​ដែល​កើតឡើង​នៅក្នុង​តំបន់ Police District 1  នៅក្នុង​ទី​រួម​ខេត្ត Tirin Kot។

ពុំមាន​ក្រុម​ណាមួយ​អះអាង​ទទួលខុសត្រូវ​ចំពោះ​ការវាយប្រហារ​នេះ​ទេ។ ទោះយ៉ាងណាមន្ត្រី​អា​ហ្វ​ហ្គា​នី​ស្ថាន​ស្តីបន្ទោស​លើ​ក្រុម​សកម្មប្រយុទ្ធ​តា​លី​បង់​ចំពោះ​ការផ្ទុះ​គ្រាប់បែក​នៅ​រយៈពេល​ប៉ុន្មាន​ខែថ្មីៗនេះ៕

ប្រែ​សម្រួល៖ Pouk Leakhena

ប្រភពព័ត៌មាន xinhuanet ចុះផ្សាយ​ថ្ងៃទី២៧ ខែមករា ឆ្នាំ២០២១