នៅថ្ងៃពុធ ទី២៧ ខែមករា មានហេតុការណ៍ផ្ទុះមួយកើតឡើងនៅភាគខាងត្បូងប្រទេសហ្វីលីពីន។ ហេតុការណ៍នោះសម្លាប់ស្ត្រីអាយុ៥៣ឆ្នាំចំនួន១នាក់និងបណ្តាលឲ្យជនស៊ីវិលចំនួន៥នាក់ផ្សេងទៀតរងរបួស។
ប៉ូលិសបញ្ជាក់ឲ្យដឹងថា ហេតុការណ៍ផ្ទុះនោះកើតឡើងនៅម៉ោងប្រហែល១២និង៣០នាទី(ម៉ោងនៅក្នុងស្រុក)នៅក្បែរផ្លូវបង្ហូរទឹកមួយក្នុងក្រុង Tulunan នៅខេត្ត Cotabato។ យោងតាមការអះអាងរបស់មន្ត្រីប៉ូលិសនៅក្នុងតំបន់បានបន្ថែមឱ្យដឹងថា ហេតុការណ៍ផ្ទុះនោះ
បណ្តាលឲ្យមានការខូចខាតដល់រថយន្តក្រុងដឹកអ្នកដំណើរទៅកាន់ស្ថានីយ៍ឡានក្រុង ប៉ុន្តែពុំបណ្តាលឲ្យអ្នកដំណើរណាម្នាក់រងរបួសនោះទេ។
ប៉ូលិសអះអាងថា អ្នកវាយប្រហារប្រើគ្រាប់បែកច្នៃនៅផ្ទះសម្រាប់ការបំផ្ទុះនេះ។យ៉ាងណាមិញ ពុំទាន់មានក្រុមណាមួយប្រកាសទទួលខុសត្រូវចំពោះការវាប្រហារនៅឡើយទេ។
គួររំលឹកផងដែរថា ការបំផ្ទុះនេះកើតឡើងនៅរយៈពេលមួយថ្ងៃក្រោយពីមានការផ្ទុះគ្រាប់បែកដ៏កក្រើកមួយនៅក្នុងខេត្ត Maguindanaoភាគខាងត្បូងប្រទេសហ្វីលីពីនដោយហេតុការណ៍នោះសម្លាប់មនុស្សចំនួន១នាក់ និងបណ្តាលឲ្យមនុស្សចំនួន១នាក់ផ្សេងទៀតរងរបួស៕
ប្រែសម្រួល៖Pouk Leakhena
ប្រភពព័ត៌មាន Xinhua ចុះផ្សាយថ្ងៃទី២៧ ខែមករា ឆ្នាំ២០២១
