យោធាអ៊ីរ៉ាក់និយាយថា នៅថ្ងៃពុធ ទី២៧ ខែមករាម្សិលមិញនេះ កងកម្លាំងសន្តិសុខអ៊ីរ៉ាក់សម្លាប់សមាជិករដ្ឋអ៊ីស្លាម(IS)ចំនួន៩នាក់ ដោយក្នុងនោះមានមេដឹកនាំជាន់ខ្ពស់ IS ចំនួន ៣នាក់នៅខេត្ត Kirkuk អំឡុងពេលធ្វើប្រតិបត្តិការប្រឆាំងនឹងឧទ្ទាម IS នៅក្នុងប្រទេស។
បើយោងតាមសេចក្តីថ្លែងការណ៍របស់កងទ័ពអ៊ីរ៉ាក់បានឲ្យដឹងថា ការប៉ះទង្គិចគ្នាមានស្ថានភាពកាន់តែខ្លាំងនៅពេលព្រឹកព្រលឹមខណៈដែលកងកម្លាំងចម្រុះមកពីកម្លាំងប្រឆាំងភេរវកម្ម និងភ្នាក់ងារស៊ើបការណ៍ជាតិបានធ្វើការវាយប្រហារទៅលើទីជម្រករបស់សមាជិកឧទ្ទាម IS នៅក្នុងតំបន់ Wadi al-Shay។
នៅក្នុងសេចក្តីថ្លែងការណ៍លើកឡើងថា សកម្មប្រយុទ្ធ IS មួយចំនួនរងការបំផ្ទុះក្រោយពីទាហានបាញ់ទៅលើអាវកាក់របស់ពួកគេ ហើយខណៈដែលអ្នកផ្សេងទៀតត្រូវទាហានបាញ់សម្លាប់នៅក្នុងអំឡុងពេលមានការប៉ះទង្គិចគ្នា។
លោក Rasoul បន្ថែមឲ្យដឹងថា សមាជិកឧទ្ទាមដែលត្រូវកម្លាំងបាញ់សម្លាប់មានមេដឹកនាំជាន់ខ្ពស់ IS ចំនួន៣ នាក់ សកម្មប្រយុទ្ធចំនួន២នាក់ដែលទទួលខុសត្រូវលើឃ្លាំងរបស់ឧទ្ទាម IS ក្នុងខេត្ត និងសកម្មប្រយុទ្ធ៤នាក់ផ្សេងទៀត។
សូមបញ្ជាក់ថា ការប៉ះទង្គិចគ្នានៅថ្ងៃពុធនោះគឺជាផ្នែកមួយនៃប្រតិបត្តិការដែលកំពុងដំណើរការ និងចាប់ផ្តើមនៅព្រឹកថ្ងៃសុក្រ ទី២២ សប្តាហ៍មុន ដើម្បីតាមប្រមាញ់សមាជិកសកម្មប្រយុទ្ធ IS តាមតំបន់ជាច្រើននៅទូរទាំងប្រទេស។
គួររំលឹកផងដែរថា ប្រតិបត្ដិការដែលកំពុងដំណើរការនេះគឺជាផ្នែកមួយនៃកិច្ចប្រឹងប្រែងរបស់កងកម្លាំងសន្តិសុខប្រឆាំងនឹងកំណើនសកម្មភាពបំផ្ទុះអត្តឃាតរបស់សមាជិកក្រុមឧទ្ទាម IS នាពេលថ្មីៗនេះដោយមានទាំងការបំផ្ទុះគ្រាប់បែកអត្តឃាតនៅថ្ងៃទី២១ ខែមករា ឆ្នាំ២០២១ សម្លាប់មនុស្សចំនួន៣២នាក់រងរបួស និងបណ្តាលឲ្យមនុស្សច្រើនជាងចំនួន ១០០នាក់ផ្សេងទៀតរងរបួសនៅក្នុងទីក្រុងបាកដាដ។ ចំណែកឯការវាយប្រហារទៅលើទីបញ្ជាការ Hashd Shaabi នៅខេត្ត Hashd Shaabi នៅថ្ងៃទី ២៣ខែមករាសម្លាប់សមាជិកក្រុមឆ្មាំចំនួន ១១នាក់ និងចំនួន ១២នាក់ផ្សេងទៀតរងរបួស៕
ប្រែសម្រួល៖Pouk Leakhena
ប្រភពព័ត៌មាន Xinhua ចុះផ្សាយថ្ងៃទី២៧ ខែមករា ឆ្នាំ២០២១