អ្នកឃ្លាំមើលសង្គ្រាមរាយការណ៍ថា នៅថ្ងៃសៅរ៍ ទី៣០ ខែមករា ឆ្នាំ២០២១ នេះ មានហេតុ ការណ៍ផ្ទុះគ្រាប់បែករថយន្តមួយកើតឡើងនៅក្នុងទីក្រុង Afrin បណ្តាលឲ្យមនុស្សចំនួន៥នាក់ស្លាប់ និងកុមារចំនួន១នាក់ រួមទាំងមនុស្សចំនួន១៥នាក់ផ្សេងទៀតរងរបួស។
យោងតាមអះអាងរបស់ក្រុមឃ្លាំមើលសិទ្ធិមនុស្សស៊ីរីបានឱ្យដឹងថា ហេតុការណ៍ផ្ទុះនេះកើតឡើងបណ្តាលមកពីមានការបំផ្ទុះគ្រាប់បែករថយន្តក្នុងសង្កាត់ Sinaa ក្នុងទីក្រុង Afrin នៅភាគខាងជើងទីក្រុង Aleppo។
ក្រុមអ្នកឃ្លាំមើលដែលមានមូលដ្ឋាននៅចក្រភពអង់គ្លេសបញ្ចាក់ឲ្យដឹងថា ចំនួនអ្នកស្លាប់អាចនឹងកើនឡើងដោយសារតែមានអ្នករងរបួសធ្ងន់ធ្ងរច្រើន។ ភ្នាក់ងារសារព័ត៌មានរដ្ឋ SANA ក៏បានរាយការណ៍ពីហេតុការណ៍ផ្ទុះនេះផងដែរ ប៉ុន្តែពុំបានផ្តល់ព័ត៌មានលម្អិតបន្ថែមទេ។
គួររំលឹកផងដែរថា ហេតុការណ៍ផ្ទុះបានក្លាយជារឿងធម្មតានៅក្នុងទីក្រុង Afrin និងតំបន់ផ្សេងទៀតដែលស្ថិតនៅក្រោមការគ្រប់គ្រងរបស់ក្រុមឧទ្ទាមនៅភាគខាងជើងប្រទេសស៊ីរីខណៈពេលដែលប្រទេសមួយនេះពុំទាន់មានច្បាប់ និងកំពុងស្ថិតក្នុងស្ថានភាពវឹកវរ។ ទីក្រុង Afrin ស្ថិតនៅក្រោមការគ្រប់គ្រងរបស់ឧទ្ទាមដែលទទួលបានការគាំទ្រពីតួកគីចាប់តាំងពីឆ្នាំ២០១៨៕
ប្រែសម្រួល៖ប៉ោក លក្ខិណា
ប្រភពព័ត៌មាន xinhuanet ចុះផ្សាយថ្ងៃទី៣០ ខែមករា ឆ្នាំ២០២១
