នៅថ្ងៃសៅរ៍ ទី៣០ ខែមករា ឆ្នាំ២០២១ នេះ លោករដ្ឋមន្ត្រីក្រសួងមហាផ្ទៃអ៊ីរ៉ាក់ Othman al-Ghanmiបានធ្វើការពិភាក្សាជាមួយលោកឯកអគ្គរដ្ឋទូតស៊ីរីប្រចាំនៅទីក្រុងបាកដាដ(Baghdad) Sattam Jada’an al-Dandah ស្តីពីមធ្យោបាយពង្រឹងទំនាក់ទំនងទ្វេភាគីជាពិសេសក្នុងវិស័យប្រយុទ្ធប្រឆាំងនឹងអំពើភេរវកម្ម។
ក្រសួងមហាផ្ទៃអ៊ីរ៉ាក់លើកឡើងនៅក្នុងសេចក្តីថ្លែងការណ៍មួយទៅកាន់អ្នកយកព័ត៌មាន ថាភាគីទាំងពីរបានពិភាក្សាគ្នាអំពីមធ្យោបាយក្នុងការពង្រឹងទំនាក់ទំនងនិងពីវិស័យទ្វេភាគីទាក់ទងនឹងផ្នែកសន្តិសុខ និងការផ្លាស់ប្តូរព័ត៌មាននិងបទពិសោធន៍។
លើសពីនេះ លោកឯកអគ្គរដ្ឋទូត al-Dandah បានកោតសរសើរចំពោះលទ្ធផលជាវិជ្ជមានដែលទទួលបានពីកិច្ចសហប្រតិបត្តិការសន្តិសុខ និងការផ្លាស់ប្តូរព័ត៌មានរវាងប្រទេសទាំងពីរនៅក្នុងរយៈពេលជាច្រើនឆ្នាំកន្លងមក។
លោកឯកអគ្គរដ្ឋទូតបន្ថែមថា ភាគីទាំងពីរបានពិភាក្សាគ្នាអំពីវិធីពង្រឹងវិធានការសន្តិសុខនិងការពង្រឹងព្រំដែនរួមគ្នាបន្ថែមលើការសម្របសម្រួលនីតិវិធីស្នាក់នៅសម្រាប់ពលរដ្ឋស៊ីរីនៅក្នុងប្រទេសអ៊ីរ៉ាក់។ លោកបញ្ជាក់ថា កិច្ចសហប្រតិបត្តិការក្នុងវិស័យប្រយុទ្ធប្រឆាំងនឹងអំពើភេរវកម្មរវាងប្រទេសស៊ីរី និងអ៊ីរ៉ាក់ នឹងនាំទៅរកលទ្ធផលសម្រេចក្នុងការលុបបំបាត់អំពើភេរវកម្មចុងក្រោយនៅក្នុងប្រទេសជាបងប្អូនទាំងពីរ។
ជាចុងក្រោយ លោកឯកអគ្គរដ្ឋទូត al-Dandah អះអាងថា កិច្ចសហប្រតិបត្តិការនេះទទួលបានលទ្ធផលជាក់ស្តែងក្នុងការកម្ចាត់អង្គភាពភេរវករ ដែលបានរីករាលដុះដាលនៅក្នុងប្រទេសទាំងពីរ និងដោះស្រាយនូវបញ្ហាផ្សេងៗដូចជា ឃាតកម្ម ការផ្លាស់ទីលំនៅ និងការលួចប្លន់ជាដើម៕
ប្រែសម្រួល៖Pouk Leakhena
ប្រភពព័ត៌មាន sana ចុះផ្សាយថ្ងៃទី៣០ ខែមករា ឆ្នាំ២០២១