កងកម្លាំងការពារជាតិអាហ្វហ្គានីស្ថានប្រាប់ឲ្យដឹងនៅថ្ងៃអាទិត្យម្សិលមិញនេះថា កម្លាំងសន្តិសុខការពារជាតិធ្វើប្រតិបត្តិការវាយឆ្មក់នៅថ្ងៃសៅរ៍ ទី៣០ ខែមករា ក្នុងខេត្ត Herat សម្លាប់សមាជិកសកម្មប្រយុទ្ធតាលីបង់ចំនួន៥នាក់។សមាជិកសកម្មប្រយុទ្ធទាំងនោះសុទ្ធតែជាអ្នកដែលទទួលបានការដោះលែងពីពន្ធនាគារនៅឆ្នាំមុន។
នៅយប់ថ្ងៃសៅរ៍ សមាជិកសកម្មប្រយុទ្ធតាលីបង់បានព្យាយាមវាយប្រហារលើប៉ុស្តិ៍ឆែកឆេរនៅស្រុក Zawul និងស្រុក Shindand ក្នុងខេត្ត Herat ។ នៅក្នុងសេចក្តីថ្លែងការណ៍របស់ក្រសួងមានសេចក្តីថា កម្លាំងសន្តិសុខធ្វើប្រតិបត្តិការវាយឆ្មក់ និងសម្លាប់សមាជិកសកម្មប្រយុទ្ធចំនួន ៥នាក់ ហើយថែមទាំងបានបំផ្លាញរថយន្តបំផ្ទុះគ្រាប់បែករបស់ពួកគេផងដែរ។ កងកម្លាំងការពារជាតិ និងសន្តិសុខជាតិអាហ្វហ្គានីស្ថាន (ANDSF) អះអាងថា ប្រតិបត្តិការវាយឆ្មក់របស់កម្លាំងសន្តិសុខធ្វើឡើងក្រោមគោលបំណងដើម្បីការពារជាតិ។ ប្រភពបន្ថែមថា មេបញ្ជាការតាលីបង់លោក Hafaz Mohammadi ស្ថិតនៅក្នុងចំណោមអ្នកស្លាប់ទាំងនោះ។
គួររំលឹកផងដែរថា នៅឆ្នាំមុនរដ្ឋាភិបាលអាហ្វហ្គានីស្ថានបានដោះលែងសមាជិកសកម្មប្រយុទ្ធតាលីបង់ចំនួនច្រើនជាង ៦២០០នាក់ ដើម្បីជួយសម្រួលដល់ការចរចាសន្តិភាព និងព្យាយាមស្វែងរកដំណោះស្រាយចំពោះសង្គ្រាមដែលអូសបន្លាយនៅក្នុងប្រទេស។
យ៉ាងណាមិញ ក្រុមសកម្មប្រយុទ្ធតាលីបង់ពុំបានធ្វើការឆ្លើយតបទៅនឹងរបាយការណ៍នេះទេរហូតមកដល់ពេលនេះ៕
ប្រែសម្រួល៖ប៉ោក លក្ខិណា
ប្រភពព័ត៌មានxinhuanet ចុះផ្សាយថ្ងៃទី៣១ ខែមករា ឆ្នាំ២០២១
