ក្រុមប្រឹក្សាសន្តិសុខអង្គការសហប្រជាជាតិបានអំពាវនាវឱ្យមានការដោះលែងមេដឹកនាំមីយ៉ាន់ម៉ាលោកស្រីអ៊ុងសានស៊ូជីនិងអ្នកផ្សេងទៀតដែលត្រូវបានចាប់ខ្លួនដោយយោធា និងបានសង្កត់ធ្ងន់លើភាពចាំបាច់ដើម្បីគាំទ្រលទ្ធិប្រជាធិបតេយ្យផងដែរ។ នៅសហរដ្ឋអាមេរិក ប្រធានាធិបតីអាមេរិក Joe Biden បាននិយាយថាយោធាគួរតែចុះចេញពីតំណែងហើយទីប្រឹក្សាសន្តិសុខរបស់គាត់បាននិយាយថារដ្ឋបាលកំពុងពិចារណាលើបទបញ្ជាប្រតិបត្តិដែលអាចរួមបញ្ចូលទាំងការដាក់ទណ្ឌកម្មជាច្រើនផងដែរទៅលើប្រទេសនេះ។
ដំណើរផ្លាស់ប្តូរដ៏វែង និងបញ្ហាជាច្រើនរបស់មីយ៉ាន់ម៉ាទៅកាន់លទ្ធិប្រជាធិបតេយ្យត្រូវបានកាត់ផ្ដាច់នៅថ្ងៃច័ន្ទនៅពេលដែលមេបញ្ជាការកងទ័ពលោក Min Aung Hlaing បានកាន់អំណាចដោយនិយាយថាវាមានភាពមិនប្រក្រតីនៅក្នុងការបោះឆ្នោតខែវិច្ឆិកាដែលគណបក្សរបស់លោកស្រីអ៊ុងសានស៊ូជីបានទទួលជោគជ័យនោះ។ គណៈកម្មការរៀបចំការបោះឆ្នោតបាននិយាយថាការបោះឆ្នោតនេះត្រឹមត្រូវយុត្តិធម៌។
ក្រុមប្រឹក្សាសន្តិសុខអង្គការសហប្រជាជាតិដែលមានសមាជិក ១៥ នាក់បាននិយាយនៅក្នុងសេចក្តីថ្លែងការណ៍មួយដែលបានឯកភាពដោយការមូលមតិគ្នាកាលពីថ្ងៃព្រហស្បតិ៍ថា ពួកគេបានសង្កត់ធ្ងន់លើភាពចាំបាច់ដើម្បីគាំទ្រស្ថាប័ននិងដំណើរការប្រជាធិបតេយ្យនានាជៀសវាងពីអំពើហឹង្សា និងការគោរពសិទ្ធិមនុស្សសេរីភាពជាមូលដ្ឋាន និងនីតិរដ្ឋ។ គួរបញ្ជាក់ផងដែរថា ប្រទេសចិនក៏មានផលប្រយោជន៍សេដ្ឋកិច្ចយ៉ាងច្រើននៅក្នុងប្រទេសមីយ៉ាន់ម៉ានិងមានទំនាក់ទំនងជាមួយយោធាផងដែរ៕
សម្រួល៖ សុផា
