នៅថ្ងៃអាទិត្យ ទី០៧ ខែកុម្ភៈ ឆ្នាំ២០២១ មានហេតុការណ៍ផ្ទុះគ្រាប់បែកកើតឡើងនៅជាយក្រុងDhusamarebភាគកណ្តាលប្រទេសសូម៉ាលី ដោយសម្លាប់កងកម្លាំងរដ្ឋាភិបាលសូម៉ាលីចំនួន១០នាក់។
លោករដ្ឋមន្ត្រីក្រសួងព័ត៌មាន Ahmed Shire ក្នុងរដ្ឋ Galmudug មានប្រសាសន៍ថាគ្រាប់បែកមួយគ្រាប់បង្កប់តាមបណ្តោយផ្លូវ El Dhere ផ្ទុះឡើងវាយប្រហាររថយន្តដឹកទាហានរដ្ឋាភិបាលបណ្តាលឱ្យមានអ្នកស្លាប់ និងរបួស។
លោក Shire មានប្រសាសន៍ថា៖“យើងអាចបញ្ជាក់បានថា មានទាហានចំនួន១០នាក់រួមទាំងមេបញ្ជាការចារកម្មម្នាក់នៅទីក្រុង Dhusamareb លោក Abdirashid Abdinur បានស្លាប់ និងមានអ្នកផ្សេងទៀតរងរបួស” ។
លោកបន្ថែមថា កងកម្លាំងធ្វើការឡោមព័ទ្ធនៅតំបន់នោះ ប៉ុន្តែគេពុំទាន់ច្បាស់ថា មានទាហានប៉ុន្មាននាក់ពិតប្រកដរងរបួសក្នុងអំឡុងការវាយប្រហារ។
ក្រុមសកម្មប្រយុទ្ធ al-Shabab អះអាងទទួលខុសត្រូវចំពោះការវាយប្រហារចុងក្រោយដែលកើតឡើងនៅរយៈពេលមួយថ្ងៃក្រោយពីលោកប្រធានាធិបតី Mohamed Farmajo និងមេដឹកនាំរដ្ឋសហព័ន្ធចំនួន ៥បញ្ចប់កិច្ចប្រជុំពិគ្រោះយោបល់រយៈពេល៥ថ្ងៃនៅក្នុងទីក្រុង។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៧ ខែកុម្ភៈ ឆ្នាំ២០២១
