យោធានិយាយនៅថ្ងៃចន្ទថា ទាហានរដ្ឋាភិបាលសម្លាប់សមាជិកសកម្មប្រយុទ្ធ Boko Haram ចំនួន៨១នាក់ក្នុងប្រតិបត្តិការថ្មីៗនៅភាគឥសាននៃប្រទេសនីហ្សេរីយ៉ា។
លោក Farouk Yahaya មេបញ្ជាការនៃប្រតិបត្តិការ Operation Lafiya Dole មានប្រសាសន៍ថា ប្រតិបត្តិការនេះធ្វើឡើងក្នុងភូមិជាច្រើននៅតំបន់ Sambisa Forest ភាគឥសាននៃរដ្ឋ Borno។ លោកពុំបានបញ្ជាក់ថា ប្រតិបត្ដិការនោះធ្វើឡើងនៅពេលណា ឬរយៈពេលយូរប៉ុណ្ណានោះទេ។ លោក Yahaya មានប្រសាសន៍ថា៖ “កងទ័ពបំផ្លាញជំរុំរបស់ភេរវករ និងរកឃើញរថយន្ដដឹកកាំភ្លើង និងអាវុធមួយចំនួនខណៈ ដែលយន្ដហោះរបស់កងទ័ពអាកាសនៅតែបន្តផ្តល់ការគាំទ្រតាមខាងអាកាស និងជួយដល់កងកម្លាំងជើងគោក” ។
លោកបញ្ជាក់ថា នៅក្នុងប្រតិបត្តិការនោះមានទាហានចំនួន១នាក់ស្លាប់ និង៤នាក់ផ្សេងទៀតរងរបួសក្នុងឧប្បត្តិហេតុមួយពាក់ព័ន្ធនឹងគ្រឿងផ្ទុះកែច្នៃដោយសមាជិកសកម្មប្រយុទ្ធ Boko Haram។
គួរបញ្ជាក់ផងដែរថា សមាជិក Boko Haram ព្យាយាមបង្កើតរដ្ឋអ៊ីស្លាមមួយនៅភាគឥសាននៃប្រទេសនីហ្សេរីយ៉ាចាប់តាំងពីឆ្នាំ២០០។ ក្រុមភេរវករបានបង្កើនការវាយប្រហាររបស់ពួកគេទៅកាន់ប្រទេសដទៃទៀតនៅក្នុងតំបន់ Lake Chad Basin៕
ប្រែសម្រួល៖ ប៉ោក លក្ខិណា
ប្រភពព័ត៌មាន xinhuanet ចុះផ្សាយថ្ងៃទី១៥ ខែកុម្ភៈ ឆ្នាំ២០២១
