មន្ត្រីនិយាយថា មានហេតុការណ៍ផ្ទុះគ្រាប់បែកមួយកើតឡើងនៅថ្ងៃព្រហស្បតិ៍ ទី១៨ខែកុម្ភៈ ក្នុងទីក្រុង Quetta ភាគនិរតីនៃខេត្ត Balochistan ប្រទេសប៉ាគីស្ថាន។
ប្រភពព័ត៌មានពីភ្នាក់ងារស៊ើបការណ៍សម្ងាត់មួយក្នុងទីក្រុងប្រាប់ភ្នាក់ងារសារព័ត៌មានក្នុងលក្ខខណ្ឌអនាមិកថា ក្រុមសកម្មប្រយុទ្ធមិនស្គាល់មុខចតម៉ូតូដឹកទំនិញដែលមានផ្ទុកគ្រឿងផ្ទុះនៅតាមដងផ្លូវ និងបំផ្ទុះវានៅពេលដែលរថយន្តរបស់កងកម្លាំងម៉ារីនជួរមុខធ្វើដំណើរឆ្លងកាត់។
ហេតុការណ៍ផ្ទុះសម្លាប់ទាហានចំនួន១នាក់ និងបណ្តាលឲ្យអ្នកធ្វើដំណើរឆ្លងកាត់ចំនួន២នាក់រងរបួស ហើយក្រោយមកអ្នករងរបួសត្រូវគេបញ្ជូនទៅមន្ទីរពេទ្យដែលមានទីតាំងក្បែរនោះ។ កម្លាំងសន្តិសុខបានឡោមព័ទ្ធនៅជុំវិញ និងអំពាវនាវឲ្យភ្នាក់ងារកម្ចាត់គ្រាប់បែកប្រមូលព័ត៌មានលម្អិតអំពីការផ្ទុះចេញពីទីតាំងកើតហេតុ។
ពុំទាន់មានក្រុមណាមួយអះអាងពីការវាយប្រហារនេះនៅឡើយទេ ប៉ុន្តែគេសន្មតថាការផ្ទុះភាគច្រើនធ្វើឡើងដោយអង្គភាពប្រឆាំងនឹងរដ្ឋាភិបាល។ ថ្មីៗនេះ កំណើននៃអំពើភេរវកម្មកើតឡើងលើកម្លាំងសន្តិសុខ និងជនស៊ីវិលនៅក្នុងខេត្ត Balochistan។
គួររំលឹកផងដែរថា នៅដើមខែនេះមនុស្សចំនួន២នាក់ស្លាប់ និងចំនួន១៩នាក់ផ្សេងទៀតរងរបួសនៅក្នុងការវាយប្រហារចំនួនពីរដាច់ដោយឡែកពីគ្នាលើការប្រមូលផ្តុំសាធារណៈនៅក្នុងខេត្ត Balochistan៕
ប្រែសម្រួល៖ ប៉ោក លក្ខិណា
ប្រភពព័ត៌មាន xinhuanet ចុះផ្សាយថ្ងៃទី១៨ ខែកុម្ភៈ ឆ្នាំ២០២១
