ការអំពាវនាវឱ្យមានកូដកម្មទូទៅមួយនៅថ្ងៃច័ន្ទ (២២ កុម្ភៈ) ដោយក្រុមបាតុករនៅក្នុងប្រទេសមីយ៉ាន់ម៉ាដែលប្រឆាំងនឹងការរឹបអូសអំណាចរបស់យោធាអាចនឹងឈានដល់ការប៉ះទង្គិចគ្នាផងដែរ។ ការអំពាវនាវឱ្យធ្វើកូដកម្មជាទូទៅត្រូវបានធ្វើឡើងនៅថ្ងៃអាទិត្យនេះដោយក្រុម Civil Disobedience Movement ដែលប្រឆាំងតស៊ូនឹងកងទ័ព។ ក្រុមនេះបានស្នើសុំឱ្យប្រជាជនប្រមូលផ្តុំគ្នាដើម្បីធ្វើ “បដិវត្តនិទាឃរដូវ” ឬ“Spring Revolution” ។
ទូរទស្សន៍រដ្ឋ MRTV កាលពីល្ងាចថ្ងៃអាទិត្យបានធ្វើការប្រកាសជាសាធារណៈពីរបបយោធាដែលហៅថាជាផ្លូវការថា State Administration Council នោះក៏ព្រមានទៅនឹងការប្រឆាំងកូដកម្មទូទៅផងដែរ។ សេចក្តីថ្លែងការណ៍និយាយជាភាសាអង់គ្លេសដែលបង្ហាញលើកញ្ចក់ទូរទស្សន៍បាននិយាយថា ក្រុមអ្នកតវ៉ាពេលនេះកំពុងញុះញង់ប្រជាជនជាពិសេសក្មេងជំទង់ និងយុវជនឱ្យទៅរកផ្លូវប្រឈមមុខគ្នាដែលពួកគេនឹងបាត់បង់ជីវិត។
ផ្នែកមួយផ្សេងទៀតនៃសេចក្តីថ្លែងការណ៍នេះបានស្តីបន្ទោសក្រុមបាតុករថាបានរួមបញ្ចូលទាំងក្រុមឧក្រិដ្ឋជនសម្រាប់អំពើហឹង្សាក្នុងការធ្វើបាតុកម្មនេះ។ រហូតមកដល់ពេលនេះ អ្នកតវ៉ា ៣ នាក់ត្រូវបានបាញ់សម្លាប់។ នៅទីក្រុងយ៉ាំងហ្គោន (Yangon) ដែលជាទីក្រុងនិងរដ្ឋធានីពាណិជ្ជកម្មធំបំផុតរបស់ប្រទេសនេះ រថយន្តដឹកទំនិញបានធ្វើដំណើរតាមដងផ្លូវនៅយប់ថ្ងៃអាទិត្យដោយប្រកាសថាប្រជាជនមិនគួរចូលរួមបាតុកម្មនៅថ្ងៃច័ន្ទនិងត្រូវគោរពការហាមឃាត់មិនឱ្យមានការប្រមូលផ្តុំមនុស្ស ៥ នាក់ឬច្រើនជាងនេះទេ៕
