នៅថ្ងៃចន្ទ ទី២២ ខែកុម្ភៈ ម្សិលមិញនេះកម្លាំងសហរដ្ឋអាមេរិកធ្វើការវាយប្រហារតាមអាកាសលើទីតាំងលាក់ខ្លួនរបស់ឧទ្ទាម IS នៅក្នុងខេត្ត Kirkuk នៅភាគខាងជើងប្រទេសអ៊ីរ៉ាក់ ដោយបានសម្លាប់សមាជិកឧទ្ទាមចំនួន៧នាក់។
ការិយាល័យប្រព័ន្ធផ្សព្វផ្សាយនៃបញ្ជាការប្រតិបត្តិការចម្រុះ (JOC) លើកឡើងនៅក្នុងសេចក្តីថ្លែងការណ៍មួយថា ផ្អែកតាមរបាយការណ៍ស៊ើបការណ៍បានឲ្យដឹងថា យន្តហោះរបស់កម្លាំងចម្រុះវាយប្រហារតាមអាកាសចំនួន៨លើកទៅលើទីតាំងរបស់ឧទ្ទាមISនៅក្នុងតំបន់រឹងមាំមួយឈ្មោះថា Wadi al-Shay។ សេចក្តីថ្លែងការណ៍ JOC បន្ថែមថា កម្លាំងកងទ័ពអ៊ីរ៉ាក់ត្រូវបានបញ្ជូនទៅកាន់ទីតាំងកើតហេតុ និងរកឃើញសាកសពរបស់សមាជិកឧទ្ទាមចំនួន៧នាក់រួមទាំងខ្សែក្រវ៉ាត់បំផ្ទុះគ្រាប់ និងឃ្លាំងអាវុធចំនួនពីរកន្លែង។
តំបន់ភ្នំ និងតំបន់រឹងមាំនៅភាគខាងជើងរដ្ឋធានី Baghdad នៃប្រទេសអ៊ីរ៉ាក់ មានសកម្មភាពរបស់សមាជិកឧទ្ទាម IS យ៉ាងខ្លាំងក្លានៅរយៈពេលប៉ុន្មានខែកន្លងមកនេះបើទោះបីជាមានប្រតិបត្តិការយោធាម្តងហើយម្តងទៀតដើម្បីតាមប្រមាញ់ពួកគេក៏ដោយ។
គួរំលឹកផងដែរថា ស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរឡើងចាប់តាំងពីកងកម្លាំងសន្តិសុខអ៊ីរ៉ាក់ចាប់ផ្តើមកម្ចាត់សមាជិកឧទ្ទាម IS នៅទូទាំងប្រទេសនៅចុងឆ្នាំ២០១។ យ៉ាងណាមិញ សមាជិកឧទ្ទាម IS ដែលនៅសេសសល់បានលាក់ខ្លួនតាមនៅតំបន់ទីប្រជុំជន ឬវាលខ្សាច់ និងតំបន់រឹងមាំផ្សេងទៀតដោយធ្វើការវាយឆ្មក់ជាញឹកញាប់ប្រឆាំងនឹងកម្លាំងសន្តិសុខ និងជនស៊ីវិល៕
ប្រែសម្រួល៖ ប៉ោក លក្ខិណា
ប្រភពព័ត៌មាន xinhuanet ចុះផ្សាយថ្ងៃទី២២ ខែកុម្ភៈ ឆ្នាំ២០២១
