នាយករដ្ឋមន្ត្រីនៃតំបន់ឃឺដលោក Masrour Barzani បានបញ្ជាក់នៅថ្ងៃអង្គារនេះថាការវាយប្រហារដែលបានកំណត់គោលដៅទៅលើរដ្ឋធានី Erbil គឺជា “ភេរវករ” ដែលមានគោលបំណងធ្វើឱ្យអស្ថិរភាពសន្តិសុខក្នុងតំបន់ ខណៈដែលបង្ហាញថាក្រុម ISIS នៅតែគំរាមកំហែងដល់តំបន់ឃឺដអ៊ីរ៉ាក់ និងពិភពលោកទាំងមូល។
លោក Barzani បានថ្លែងនៅក្នុងបទសម្ភាសន៍ជាមួយសារព័ត៌មាន France 24 ថាតំបន់ឃឺដនឹងមិនថ្កោលទោសចំពោះភាគីណាមួយទាក់ទងនឹងការទម្លាក់គ្រាប់បែកលើរដ្ឋធានី Erbil កាលពីចុងខែមុននោះទេដោយសង្កត់ធ្ងន់ថាលទ្ធផលនៃការស៊ើបអង្កេតនឹងត្រូវប្រកាសក្នុងពេលឆាប់ៗហើយជនល្មើសនឹងត្រូវបាននាំមកជំនុំជម្រះ។
នៅក្នុងបរិបទមួយផ្សេងទៀតលោកបានចង្អុលបង្ហាញថា ISIS នៅតែគំរាមកំហែងដល់តំបន់ឃឺដអ៊ីរ៉ាក់ និងពិភពលោកទាំងមូល បើទោះបីជាក្រុមនេះបានទទួលការបរាជ័យពីមុនក៏ដោយ តែក្រុមនេះនៅតែអាចជ្រើសរើសសមាជិកថ្មីទៀតដើម្បីបើកប្រតិបត្តិការវាយប្រហារសំដៅទៅលើសន្តិសុខ និងជនស៊ីវិលនៅក្នុងតំបន់មួយចំនួនក្នុងប្រទេសអ៊ីរ៉ាក់។
អ្នកប្រែសម្រួល៖ គល់ សេងហាក់
ប្រភពព័ត៌មានពី kurdiu ចេញផ្សាយថ្ងៃទី០២ ខែមីនា ឆ្នាំ២០២១
