ទីក្រុងមូស្គូបានវាយបកទៅលើបណ្តាប្រទេសលោកខាងលិចកាលពីថ្ងៃពុធ (៣ មីនា) ចំពោះការដាក់ទណ្ឌកម្មមន្ត្រីជាន់ខ្ពស់ជាច្រើនរបស់ប្រទេសរុស្ស៊ី។ ប្រទេសរុស្សីបានព្រមានដល់សត្រូវរបស់ខ្លួនថា“ កុំលេងជាមួយភ្លើង” ។ វិមានក្រឹមឡាំងបានចោទប្រកាន់ទីក្រុងវ៉ាស៊ីនតោន និងព្រុចសែលពីការជ្រៀតជ្រែកបន្ទាប់ពីសហរដ្ឋអាមេរិកនិងសហភាពអឺរ៉ុបបានដាក់ទណ្ឌកម្មថ្មីជាច្រើនកាលពីថ្ងៃអង្គារនេះទៅលើលោកNavalnyដែលត្រូវបានជាប់ពន្ធនាគារកាលពីខែមុននៅពេលគាត់បានវិលត្រឡប់មកពីប្រទេសអាឡឺម៉ង់។
អ្នកនាំពាក្យវិមានក្រឹមឡាំងលោក Dmitry Peskov បានប្រាប់អ្នកយកព័ត៌មានកាលពីថ្ងៃពុធថា យើងជឿជាក់ថាវិធានការណ៍បែបនេះមិនអាចទទួលយកបានទេពីព្រោះវាបំផ្លាញនូវទំនាក់ទំនងមិនល្អរួចទៅហើយ។ លោកបាននិយាយថាទណ្ឌកម្មថ្មីនេះគឺជា“ ការជ្រៀតជ្រែក” នៅក្នុងកិច្ចការផ្ទៃក្នុងរបស់ប្រទេសរុស្ស៊ីហើយបានប្តេជ្ញាចាត់វិធានការឆ្លើយតបដោយមិនបញ្ជាក់ពីវិធានការណ៍នានានៅឡើយទេ។
អ្នកនាំពាក្យក្រសួងការបរទេស Maria Zakharova បានព្រមានប្រទេសលោកខាងលិចមុននេះថា កុំលេងជាមួយភ្លើងអោយសោះ។ លោកស្រីបាននិយាយនៅក្នុងសេចក្តីថ្លែងការណ៍មួយដែលត្រូវបានចេញផ្សាយកាលពីល្ងាចថ្ងៃអង្គារថា“ យើងនឹងបន្តការពារផលប្រយោជន៍ជាតិរបស់យើងជាប្រព័ន្ធ និងជាដាច់ខាតនូវការរំលោភឈ្លានពាន”៕
សម្រួល៖ សុផា
