ក្រុមឃ្លាំមើលសិទ្ធិមនុស្សរបស់ប្រទេសហ្វីលីពីនបាននិយាយកាលពីថ្ងៃចន្ទទី ៨ ខែមីនាថា ខ្លួនបានបើកការស៊ើបអង្កេតមួយបន្ទាប់ពីមនុស្ស ៩ នាក់ត្រូវបានសម្លាប់នៅក្នុងការវាយឆ្មក់ជាបន្តបន្ទាប់ដោយកម្លាំងសន្តិសុខដែលបានវាយប្រហារទៅលើក្រុមបះបោរកុម្មុយនិស្ត។
ក្រុមឆ្វេងនិយម Bayan បាននិយាយថាមនុស្សទាំងអស់ដែលត្រូវបានសម្លាប់ ឬចាប់ខ្លួននៅក្នុងប្រតិបត្តិការនៅថ្ងៃអាទិត្យនៅក្បែរទីក្រុងម៉ានីលគឺជាសកម្មជនដែលគ្មានអាវុធ។ ប៉ុន្តែលោក Debold Sinas អគ្គស្នងការនគរបាលជាតិបាននិយាយថាប្រតិបត្តិការដែលពាក់ព័ន្ធនឹងប៉ូលិសនិងបុគ្គលិកយោធាត្រូវបានធ្វើឡើងដើម្បីឆ្លើយតបទៅនឹងរបាយការណ៍ដែលថាជនសង្ស័យស្ថិតនៅក្នុងការ“កាន់កាប់អាវុធដោយខុសច្បាប់” ។
លោកបាននិយាយថាមនុស្ស ៩ នាក់ត្រូវបានសម្លាប់ និង ១៥ នាក់ត្រូវបានចាប់ខ្លួនអំឡុងការវាយឆ្មក់នេះ។ ឧប្បត្តិហេតុនេះបានកើតឡើងពីរថ្ងៃបន្ទាប់ពីប្រធានាធិបតី Rodrigo Duterte បានបញ្ជាម្តងហើយម្តងទៀតឱ្យកងកម្លាំងសន្តិសុខ“ កុំខ្វល់លើបញ្ហាសិទ្ធិមនុស្ស” និងសម្លាប់ក្រុមឧទ្ទាមកុម្មុយនិស្ត។ គណៈកម្មការឯករាជ្យសិទ្ធិមនុស្សបាននិយាយថាខ្លួនបានបញ្ជូនក្រុមមួយដើម្បីស៊ើបអង្កេតការសម្លាប់និងការចាប់ខ្លួននេះផងដែរ៕
សម្រួល៖ សុផា
