ប្រទេសអ៊ីស្រាអែល៖ លោក យ៉ូវ ហ្កាលិន រដ្ឋមន្ត្រីក្រសួងការពារជាតិបាននិយាយកាលពីថ្ងៃព្រហស្បតិ៍ថា ប្រទេសរបស់លោកនឹងសងសឹកអ្នកដែលទទួលខុសត្រូវចំពោះការវាយប្រហារបំផ្ទុះគ្រាប់បែកតាមដងផ្លូវ ដែលបណ្តាលឱ្យពលរដ្ឋអ៊ីស្រាអែលម្នាក់រងរបួសយ៉ាងធ្ងន់ធ្ងរកាលពីដើមសប្តាហ៍នេះ។
លោក ហ្កាលិន បានថ្លែងក្នុងអំឡុងពេលដំណើរទស្សនកិច្ចត្រួតពិនិត្យនៅតាមបណ្តោយព្រំដែនប្រទេសអ៊ីស្រាអែល និងប្រទេសលីបង់ បន្ទាប់ពីយោធាអ៊ីស្រាអែលចេញសេចក្តីថ្លែងការណ៍អះអាងថា ជនសង្ស័យម្នាក់ក្នុងការវាយប្រហារបំផ្ទុះគ្រាប់បែកបានរត់គេចខ្លួនចេញពីប្រទេសលីបង់ចូលទៅក្នុងប្រទេសអ៊ីស្រាអែលតាមព្រំដែន។
បន្ទាប់ពីបានជួបមន្ត្រីកងពលដែលឈរជើងតាមព្រំដែន លោក ហ្កាលិន បានប្រាប់អ្នកយកព័ត៌មានថា ៖ “យើងនឹងស្វែងរកពេលវេលាត្រឹមត្រូវ និងវិធីសមស្របដើម្បីវាយបកវិញ”។
ទោះបីជាយ៉ាងណាក៏ដោយ លោកបានកត់សម្គាល់ថា ប្រទេសអ៊ីស្រាអែលនៅតែត្រូវការពេលវេលាដើម្បីស៊ើបអង្កេតហេតុការណ៍បំផ្ទុះគ្រាប់បែកនៅតាមដងផ្លូវ ខណៈដែលមានសំណួរជាច្រើននៅតែមិនទាន់អាចបកស្រាយបាន។
កាលពីថ្ងៃពុធ យោធាអ៊ីស្រាអែលបាននិយាយនៅក្នុងសេចក្តីថ្លែងការណ៍ គ្រាប់បែកតាមដងផ្លូវបានផ្ទុះឡើង និងបង្ករបួសដល់ជនជាតិអារ៉ាប់ម្នាក់របស់ប្រទេសអ៊ីស្រាអែលកាលពីថ្ងៃចន្ទ។
បន្ថែមខ្លឹមសារក្នុងសេចក្តីថ្លែងការណ៍បង្ហាញថា ក្រោពេលវាយប្រហារចប់ កម្លាំងអ៊ីស្រាអែលតាមប្រមាញ់ទ្រង់ទ្រាយធំ ដែលបានចាប់ខ្លួន និងសម្លាប់ជនសង្ស័យក្នុងរយៈពេលប៉ុន្មានម៉ោងក្រោយមក។ កម្លាំងយោធាកំពុងត្រួតពិនិត្យមើលលទ្ធភាពនៃការពាក់ព័ន្ធរបស់ក្រុមហេសបូឡា (Hezbollah)។
ទោះបីជាយ៉ាងណាក៏ដោយ យោងតាមប្រព័ន្ធផ្សព្វផ្សាយលីបង់បានឱ្យដឹងថា លោក អេនដ្រៀរ ថេណិនធី អ្នកនាំពាក្យកងកម្លាំងបណ្តោះអាសន្នរបស់អង្គការសហប្រជាជាតិប្រចាំប្រទេសលីបង់ បាននិយាយកាលពីថ្ងៃព្រហស្បតិ៍ថា នាពេលថ្មីៗនេះពុំមានកំណត់ត្រានៃការឆ្លងកាត់រវាងប្រទេសលីបង់ និងអ៊ីស្រាអែល នោះទេ។
គួរបញ្ជាក់ផងដែរថា ក្រុមហេសបូឡា (Hezbollah) គឺជាក្រុមកងជីវពលស្ហៀលីបង់ ដែល គ្រប់គ្រងតំបន់មួយចំនួនធំនៅភាគខាងត្បូងប្រទេសលីបង់។ ក្រុមនេះបានប្រយុទ្ធប្រឆាំងនឹងកម្លាំងអ៊ីស្រាអែលអស់ជាច្រើនទសវត្សរ៍មកហើយ៕
ប្រភពព័ត៌មាន Xinhua ចុះផ្សាយថ្ងៃទី១៧ ខែមីនា ឆ្នាំ២០២៣