ប្រទេសអ៊ីរ៉ាក់៖ យោធាអ៊ីរ៉ាក់បាននិយាយកាលពីថ្ងៃអង្គារថា កងកម្លាំងរបស់ខ្លួនបានសម្លាប់ក្រុមសកម្មប្រយុទ្ធរដ្ឋអ៊ីស្លាម (IS) ៣នាក់ នៅភាគខាងជើងប្រទេស។
ការិយាល័យប្រព័ន្ធផ្សព្វផ្សាយនៃបញ្ជាការប្រតិបត្តិការរួមអ៊ីរ៉ាក់បានលើកឡើងនៅក្នុងសេចក្តីថ្លែងការណ៍ថា ក្រុមសកម្មប្រយុទ្ធរដ្ឋអ៊ីស្លាម (IS) ៣នាក់ ត្រូវបានសម្លាប់នៅក្នុងតំបន់ វ៉ាឌីអាល់ស្ហេ ខាងជើងទីក្រុងកឺកុក ។
នៅក្នុងសេចក្តីថ្លែងការណ៍មានខ្លឹមសារបន្ថែមថា ប្រតិបត្តិការណ៍នោះគឺធ្វើឡើងដោយផ្អែកលើរបាយការណ៍ចារកម្ម ហើយមុនពេលធ្វើប្រតិបត្តិការ ក្រុមសកម្មប្រយុទ្ធរដ្ឋអ៊ីស្លាម ៣នាក់ស្ថិតក្រោមការតាមដានរយៈពេលប្រមាណជា៣ថ្ងៃ។
ទន្ទឹមនឹងនេះ សេចក្តីថ្លែងការណ៍មួយដែលចេញផ្សាយដោយសេវាកម្មស៊ើបការណ៍សម្ងាត់អ៊ីរ៉ាក់បាននិយាយថា “បុគ្គលិកស៊ើបការណ៍សម្ងាត់បានតាមដានតួលេខឈានមុខក្រុមសកម្មប្រយុទ្ធរដ្ឋអ៊ីស្លាម IS មួយចំនួននៅក្នុងប្រទេសច្រើនជាងមួយប្រទេស និងអាចចាប់ខ្លួនពួកគេនៅក្នុងប្រទេសដែលមិនជាប្រទេសជិតខាងគ្នា និងបញ្ជូនពួកគេទៅកាន់ប្រទេសអ៊ីរ៉ាក់។”
ក្រុមភេរវករដែលត្រូវបានចាប់ខ្លួន ដែលគេជឿថាមានពាក់ព័ន្ធនឹងអំពើឧក្រិដ្ឋកម្មទាំងនៅក្នុងនិងក្រៅប្រទេសអ៊ីរ៉ាក់ នឹងត្រូវបានប្រគល់ទៅឱ្យតុលាការអ៊ីរ៉ាក់ដើម្បីទទួលទោស នេះបើយោងតាមសេចក្តីថ្លែងការណ៍។
សេចក្តីថ្លែងការណ៍មិនបានផ្តល់ព័ត៌មានលម្អិតបន្ថែមពីពេលវេលា និងទីកន្លែងជាក់លាក់ដែលក្រុមភេរវករត្រូវបានចាប់ខ្លួននោះទេ ហើយក៏មិនបានបញ្ជាក់ពីចំនួនរបស់ពួកគេដែរ។
គួររំលឹកផងដែរថា ស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរឡើងជាងមុន ចាប់តាំងពីកម្លាំងសន្តិសុខអ៊ីរ៉ាក់បានកម្ចាត់ក្រុមសកម្មប្រយុទ្ធរដ្ឋអ៊ីស្លាមក្នុងឆ្នាំ២០១៧។ ទោះបីជាយ៉ាងណាក៏ដោយក្រុមសកម្មប្រយុទ្ធរដ្ឋអ៊ីស្លាមដែលនៅសេសសល់បានបង្កប់ខ្លួននៅតាមទីក្រុង តំបន់វាលខ្សាច់ និងតំបន់ខ្ពង់រាបផ្សេងទៀតដោយបានធ្វើការវាយឆ្មក់ជាញឹកញាប់ប្រឆាំងនឹងកម្លាំងសន្តិសុខ និងជនស៊ីវិល៕
ប្រភពព័ត៌មាន Xinhua ចុះផ្សាយថ្ងៃទី១៥ ខែកុម្ភៈ ឆ្នាំ២០២៣
