ប្រទេសបួគីណាហ្វាសូ៖ មន្ត្រីរដ្ឋាភិបាលប្រចាំតំបន់បាននិយាយកាលពីថ្ងៃសៅរ៍ថា យ៉ាងហោចណាស់ជនស៊ីវិល ៤៤នាក់ ត្រូវបានសម្លាប់កាលពីយប់ថ្ងៃព្រហស្បតិ៍ ក្នុងការវាយប្រហារភេរវកម្ម ២លើកនៅក្នុងតំបន់ស្ហាហែល ភាគខាងជើងប្រទេសបួគីណាហ្វាសូ។
លោកវរសេនីយ៍ទោ រ៉ូដដបស័រហ្គូ ដែលជាអភិបាលនៃតំបន់ស្ហាហែលបាននិយាយនៅក្នុងសេចក្តីថ្លែងការណ៍មួយថា ក្រុមភេរវករប្រដាប់អាវុធបានវាយប្រហារចូលទៅក្នុងភូមិគួរ៉ាកូនិងភូមិថុនដូប៊ីដែលស្ថិតនៅចម្ងាយប្រមាណជា៥គីឡូម៉ែត្រពីឃុំសីថេនហ្កាក្នុងខេត្តសេណូដោយបានសម្លាប់ជនស៊ីវិល៤៤នាក់បង្ករបួសដល់មនុស្សជាច្រើននាក់និងបង្កការខូចខាតដល់សម្ភារៈមួយចំនួន។
លោកអភិបាលខេត្តបានធានាដល់ប្រជាជនថា សកម្មភាពដើម្បីរក្សាស្ថិរភាពក្នុងតំបន់កំពុងដំណើរការ ក្រោយពីមានការបង្ក្រាបដែលដឹកនាំដោយកម្លាំងការពារ និងក្រុមសន្តិសុខ។ លោកថែមទាំងបានអញ្ជើញប្រជាពលរដ្ឋក្នុងមូលដ្ឋានឲ្យរួបរួមជាមួយកម្លាំងការពារ និងក្រុមសន្តិសុខ។
កាលពីឆ្នាំ២០១៥ ភាពអសន្តិសុខនៅក្នុងប្រទេសអាហ្វ្រិកខាងលិចបានសម្លាប់មនុស្សជាច្រើននាក់ និងមនុស្សរាប់ពាន់នាក់ផ្សេងទៀតបានផ្លាស់ទីលំនៅ៕
ប្រភពព័ត៌មាន Xinhua ចុះផ្សាយថ្ងៃទី៩ ខែមេសា ឆ្នាំ២០២៣
